Xarici investorlar Azərbaycandan 1 milyard dollar aparıb
13:21 / 14.09.2021
1325
Bu ilin birinci yarısında ilkin gəlirlər üzrə daxilolmaların və ödənişlərin ümumi dövriyyəsi 2,3 milyard dollar olub.
Sfera.az Mərkəzi Banka istinadən bildirir ki, bunun 62,1%-i (1,4 milyard dollar) Azərbaycandan qeyri-rezidentlərə (xarici vətəndaşlara) ödənişlər təşkil edib. Bu məbləğin isə əsas hissəsi (989,9 milyon dollar) xarici investorların payına düşən gəlirlərin repatriasiyasından (əsasən beynəlxalq neft-qaz konsorsiumları üzrə xam neft şəklində repatriasiya), qiymətli kağızlar portfeli üzrə qeyri-rezidentlərə ödənilən faizlərdən (173,9 milyon dollar), xarici kreditlərdən istifadəyə görə ödənilən faizlərdən (147,3 milyon dollar) və digər ödənişlərdən (126,6 milyon dollar) ibarətdir.
2020-ci ilin birinci yarısı ilə müqayisədə xarici investorların Azərbaycandan əldə etdiyi gəlir 57 faiz artıb. Ötən ilin yanvar-iyun ayları ərzində əcnəbilər 631,3 milyon dollar ölkədən aparmışdı. Bu il repatriasiya məbləği 358,6 milyon dollar artıb.
2020-ci ilin birinci yarısında qiymətli kağızlar portfeli üzrə qeyri-rezidentlərə ödənilən faizlər 170 milyon dollar, xarici kreditlərdən istifadəyə görə ödənilən faizlər 225,4 milyon dollar və digər ödənişlər 201,3 milyon dollar olmuşdu. Bu il faiz ödənişləri 74,2 milyon dollar azalıb.
Vasif
Sfera.az