Ukraynada müharibə olarsa, neft yenidən ucuzlaşacaq - ŞƏRH
15:25 / 09.04.2021
1364
Ukrayna ətrafında hərbi-siyasi gərginliyin artması neft
qiymətlərinin yenindən kəskin enməsinə səbəb ola bilər. Son günlər Rusiyanın
Ukraynanın şərq sərhədlərinə çoxlu sayda əsgər və hərbi vasitələr cəmləşdirməsi
müharibə ehtimalını gücləndirir. Rusiyanın Ukraynaya qarşı hərbi müdaxiləsini
dayandırmaq üçün neftin ucuzlaşdırılması ehtimalı istisna edilmir.
Sfera.az xatırladır ki, 2014-cü ildə Rusiyanın Krım
Muxtar Respublikasını ilhaq etməsi və Ukraynanın şərq vilayətlərində separatçı
fəaliyyətin baş verməsi ABŞ-ın Rusiyaya qarşı ağır sanksiyalar tətbiq etməsi ilə
nəticələndi. Rəsmi sanksiyalarla bərabər ABŞ müttəfiqləri ilə birgə qeyri-rəsmi
sanksiyalar da tətbiq etdi. Qeyri-rəsmi sanksiyalardan ən güclüsü neftin kəskin
ucuzlaşdırılması oldu.
Ukrayna hadisələrinə qədər neftin bir bareli 110-115
dollara satılırdı. ABŞ-la Rusiya arasında siyasi gərginliyin artmasından sonra
qiymətlər 37 dollara qədər düşdü.
ABŞ-ın neft qiymətlərini endirməkdə əsas məqsədi Rusiyanın
ixracını, ÜDM istehsalını və dövlət büdcəsinin gəlirlərini azaltmaq idi. 2013-cü
ildə Rusiyanın ÜDM istehsalı 2,1 trilyon dollar, ixracı 550 milyard dollar,
dövlət büdcəsi 600 milyard dollar idi. Həmin dövrdə bir dollar 30 rubla dəyişdirilirdi.
Neftin ucuzlaşmasından sonra 2020-ci ildə Rusiyada ÜDM istehsalı 1,45 trilyon
dollar, ixrac 338 milyard dollar, dövlət büdcəsi 420 milyard dollar oldu. Ötən
il bir dollar təxminən 70 rubla yüksəldi.
İqtisadiyyatın gəlirinin azalması və dövlət büdcəsinin
kiçilməsi Rusiyanı hərbi xərclərini də azaltmağa məcbur etdi. 2013-cü ildə hərbi
büdcəsi 88 milyard dollar olan Rusiya müdafiə xərclərini ötən il 45 milyard
dollara qədər azaldıb.
Rusiya iqtisadiyyatında baş verən dəyər itkisi
neftin kəskin ucuzlaşması hesabına mümkün olub. Çünki Rusiya ixracının 70 faizdən
çoxu neft-qaz sektoruna aid olan məhsullardır. Buna görə də neftin ucuzlaşması
Rusiyaya çox ciddi zərər vurur.
Hazırda neft qiymətləri 60 dollar səviyyəsində dəyişir
və bu qiymət səviyyəsi Rusiyaya sərf edir. İstisna etmək olmaz ki, Rusiya
Ukrayna ilə birbaşa münaqişəyə girərsə, neft qiymətləri növbəti dəfə dibə düşəcək.
Bu dəfə qiymətlərin 30-40 dollar intervalına qədər geriləməsi tam realdır.
Hamıya bəllidir ki, neft qiymətləri bazarın tənzimlənməsi
hesabına formalaşır. Əgər OPEC+ çərçivəsində razılaşma pozularsa və hasilat
yenidən artırılarsa, o halda qiymətlərin enməsi qaçınılmaz olacaq.
Razılaşmanın pozulub-pozulmayacağı isə siyasi qərarlardan
asılıdır. ABŞ və Rusiya arasında siyasi gərginlik artacağı təqdirdə Rusiyaya təsir
vasitəsi kimi neftin ucuzlaşdırılması mümkün variantlardır.
Vasif