“Changemakers” AI Hackathon "Oxbridge" Akademiyasında uğurla keçirildi - FOTOLAR

"Oxbridge" Akademiyasının Şagird Şurasının təşkilatçılığı ilə keçirilən “Changemakers” AI Hackathon 25 yanvar tarixində baş tutub.

Sfera.az xəbər verir ki, tədbir gənc istedadları süni intellekt (AI) vasitəsilə innovativ layihələr yaratmaq və əməkdaşlıq etmək üçün bir araya gətirib.

Hackathonda 16 şagird qrupu iştirak edərək real dünya problemlərinə yönəlmiş yaradıcı və təsirli AI həllərini təqdim edib. Tədbirin sponsorları "Oxbridge" Akademiyası, BirBank və SepTem Tech olub. Sponsorlar iştirakçılara mentorluq, metodiki rəhbərlik və texniki dəstək göstəriblər.

Qısa zaman kəsiyində komandalar şəklində işləyən iştirakçılar süni intellektdən istifadə etməklə innovativ ideyalar və praktik həllər hazırlayıblar. Bu format yaradıcılığın, komandada işləmə bacarıqlarının, problem həll etmə vərdişlərinin və müasir texnologiyalar üzrə praktik təcrübənin inkişafına şərait yaradıb.

“Changemakers” AI Hackathon yalnız texniki bacarıqların nümayişi ilə kifayətlənməyərək, eyni zamanda AI-nin məsuliyyətli və cəmiyyət üçün faydalı istifadəsinin vacibliyini ön plana çıxarıb. Tədbir gənclərin texnologiya vasitəsilə müsbət sosial təsir yaratmaq öhdəliyini bir daha vurğulayıb.