İsmayıllıda yüksək bal toplayan məzunlarla görüş keçirilib

İsmayıllıda yüksək bal toplayan məzunlarla görüş keçirilib .Bu gün 2024–2025-ci tədris ilində İsmayıllı rayonunda təhsil sahəsində fərqlənən məzunlarla görüş təşkil olunub.

Sfera.az xəbər verir ki, bu il rayon üzrə 535-dən çox şagird tələbə adını qazanaraq respublikanın müxtəlif ali məktəblərinə qəbul olub.

Onlardan 30 nəfəri 600-dən, 86 nəfəri isə 500-dən yuxarı bal toplayıb.

Ən yüksək nəticəni İsmayıllı şəhər N. Behdiyev adına 6 saylı tam orta məktəbin məzunu Həsənli Osman Rahim oğlu göstərib.

O, 673,8 bal toplayaraq Bakı Ali Neft Məktəbinə qəbul olunub. Tədbirdə rayon icra hakimiyyətinin başçısı uğur qazanmış gəncləri, onların müəllim və valideynlərini təbrik edib, gələcək fəaliyyətlərində uğurlar arzulayıb.

Qeyd olunub ki, təhsil hər bir ölkənin və rayonun sosial-iqtisadi inkişafında mühüm rol oynayır. Ulu Öndər Heydər Əliyevin “Təhsil millətin gələcəyidir” kəlamı vurğulanaraq bildirilib ki, Prezident İlham Əliyev və Birinci vitse-prezident Mehriban Əliyevanın diqqət və qayğısı nəticəsində ölkədə təhsil sistemi daim inkişaf edir. İsmayıllı gənclərinin uğurları isə rayon təhsilinin ön sıralarda olmasına xidmət edir.