"Attestatında “əla” qiymətləri olan minlərlə abituriyent aşağı bal yığıb"

“Attestatında “əla” qiymətləri olan minlərlə abituriyent qəbul imtahanından 40 baldan aşağı nəticə əldə edib”.

Sfera.az xəbər verir ki, bunu Dövlət İmtahan Mərkəzinin sədri Məleykə Abbaszadə, Dövlət İmtahan Mərkəzində ötən il – 2024-cü ildə keçirilən ali təhsil müəssisələrinin bakalavriat səviyyəsinə tələbə qəbulu imtahanlarının nəticələrinin elmi-statistik təhlili ilə bağlı təşkil olunmuş müzakirələrdə bildirib.

Onun sözlərinə görə, ana dili fənnindən attestatı “əla” olan 38 377 abituriyentin 1 392 nəfəri imtahanda cəmi 0–40 bal toplayıb. Onların 334 nəfəri isə, ümumiyyətlə, 0–20 bal intervalında nəticə göstərib.

Riyaziyyat fənni üzrə vəziyyət daha da kəskindir. Belə ki, bu fənndən attestatı “əla” olan 26 362 abituriyentin 5 114 nəfəri yalnız 0–40 bal toplaya bilib. Onlardan 1 257 nəfərin nəticəsi isə 0–20 bal aralığında qalıb.

M.Abbaszadə qeyd edib ki, xarici dil fənni üzrə isə 0–40 bal aralığında nəticə göstərənlərin sayı 4 909 nəfərdir. Ümumilikdə, bu fənn üzrə 33 740 nəfərin attestat qiyməti “əla” olsa da, onlardan 1 123 nəfəri yalnız 0–20 bal toplaya bilib.

Fidan Hacızadə
Sfera.az