Çin hökuməti 1 sentyabr 2025-ci ildən etibarən bütün ibtidai və orta məktəblərdə süni intellekt (AI) təhsilini məcburi edir. Yeni təhsil proqramına əsasən, şagirdlər hər akademik il üçün ən azı 8 saat AI dərsi alacaqlar.

Çağdaş dövrün tələblərini nəzərə alsaq, ölkəmizdə də bu addımın atılması mümkün ola bilərmi?

Mövzu ilə bağlı Sfera.az-a açıqlama verən təhsil eksperti Elçin Əfəndi bildirib ki, inkişaf edən informasiya texnologiyalarının tətbiqinə hazır olmalıyıq:

“Hazırda informasiya əsrində yaşayırıq. Hər keçən gün informasiya texnologiyaları sahəsində daha bir yenilik baş verir. Bu yenilikləri də vaxtında tətbiq etmək üçün Azərbaycan cəmiyyəti hər zaman hazır olmalıdır. Demək olar ki, dünyanın bütün ölkələrində müxtəlif sferalarda süni intellektdən istifadə olunmağa başlanılıb. Bunlardan biri də təhsil sahəsidir”.

Onun sözlərinə görə, ölkəmizdə də, bu il alınmasa, gələn tədris ilindən etibarən süni intellekt istiqamətində müvafiq tədris prosesi həyata keçirilməyə çalışılmalıdır:

“Bu, müəyyən qədər şagirdlərin dərs yükünün artması ilə nəticələnə bilər. Ən azından, beşinci sinifdən etibarən bu dərslərin tədrisi həyata keçirilməlidir. Dövlət başçısı tərəfindən müvafiq olaraq Süni İntellekt Mərkəzinin yaradılması ilə bağlı tapşırıq verilib. Elm və Təhsil Nazirliyi və Məktəbəqədər və Ümumi Təhsil üzrə Dövlət Agentliyi arasında razılıq əldə oluna bilər. Bu razılıq əsasında tədris prosesi həyata keçirilə bilər. Ola bilsin ki, qarşıdakı 5-10 il ərzində artıq süni intellektin təhsil prosesində daha çox fayda verəcəyini görəcəyik. Bu həm təhsil alanların, həm də təhsil verənlərin daha səmərəli fəaliyyətinə imkan yaradacaq”.

Firuzə Əliyeva
Sfera.az

Azərbaycan məktəblərində süni intellekt dərsi keçiriləcək? - AÇIQLAMA