Fidan Əliyeva və Ləman Əliyeva da iyunun 1-də keçirilən qəbul imtahanında IV ixtisas qrupu üzrə maksimum nəticə - 400 bal toplayan abituriyentlərdəndir.

Sfera.az xəbər verir ki, “Azərbaycan müəllimi” uğurlu məzunlarla həmsöhbət olub, onların təəssüratlarını öyrənib.

Sumqayıt şəhəri Nizami Gəncəvi adına Texniki və təbiət elmləri liseyin məzunu Fidan Əliyeva bildirir ki, uşaqlıqdan texniki və təbiət fənlərinə marağı böyük olub, xüsusilə riyaziyyata daha çox həvəs göstərib: “Anamın riyaziyyat və informatika müəllimi olması və aşağı siniflərdən o fənni mənə sevdirməsi uğurlarımın əsas səbəblərindəndir. 10 və 11-ci siniflərə qədər riyaziyyat fənnindən bir sıra olimpiada və müsabiqələrdə iştirak etmişəm. SDU-nun keçirdiyi bilik yarışmalarında ardıcıl olaraq 3 dəfə 3-cü yeri tutmuşam. 10 və 11-ci siniflərdə bütün diqqətimi ancaq dərslərimə yönəltmişəm”.

Uğurlu abituriyent qəbul imtahanında yüksək nəticə əldə etməyinin başlıca səbəbini bu yolda ona dəstək olan müəllim və valideynlərinin dəstəyi ilə əlaqələndirir: “Digər amil isə planlı və məqsədli çalışmaqdır. Nəticəmi eşidəndə ona görə sevindim ki, valideynlərimin və müəllimlərimin etimadını doğrulda bildim. Bu hiss ifadə edilə bilməyəcək qədər gözəldir, hər kəsə bu sevinci yaşamağı arzu edirəm!”.

Fidanın sözlərinə görə, bugünkü sevinc hissi onu daha böyük uğur qazanmağa ruhlandırır: “Gələcəkdə Vətənimə, millətimə faydalı, xeyirli kadrlardan olmaq istəyirəm. Mən Azərbaycan Tibb Universitetində təhsilimi davam etdirmək istəyirəm”.

Xaçmaz şəhəri akademik Zərifə Əliyeva adına 8 nömrəli məktəb-liseyin məzunu Ləman Əliyeva qeyd edir ki, 8-ci sinifdən bașlayaraq müxtəlif fənlər üzrə olimpiadalarda iştirak edib, ancaq finala qədər gəlib çata bilməyib: “Ən sevimli fənnim kimya olub, kimyanın məntiqini müəyyən qədər tutduğumdan ișləmək əyləncəli olurdu. 10-cu sinifdən bașlayaraq ciddi șəkildə blok fənlərinə hazırlașmağa başladım. Biologiyanı çox təkrarlayırdım, kimya və fizikadan çoxlu sınaq testləri ișləyirdim. Kimyadan daha yuxarı səviyyəli tapşırıqlar ișləmişəm, özümü ən çətin imtahanlara hazırlamağa çalıșmışam. Qəbul imtahanında da cavabları tez yazdım, onları 2 dəfə yoxladım, çünkü əsas məsələ diqqət idi”.

Müəllimlərinin əməyini xüsusi dəyərləndirən istedadlı məzun onların və valideynlərinin inamını doğrultduğu üçün qürur duyduğunu, bundan sonra da təhsilinə böyük önəm verəcəyini dilə gətirir: “Çox sevincliyəm və qürur hiss edirəm. Azərbaycan Tibb Universitetində “Müalicə işi” ixtisasına qəbul olub, həkim olmaq istəyirəm. Bu nəticə özümü inkişaf etdirməyə olan marağı daha da artırır”.

Həkim olmaq istəyirik - Qəbul imtahanında maksimum bal toplayanlar