300 bal toplayanların sayı niyə kəskin artdı? DİM izah etsin!
Son illərdə Dövlət İmtahan Mərkəzinin keçirdiyi buraxılış imtahanlarında (tam orta təhsil səviyyəsi üzrə) maksimum 300 bal toplayan abituriyentlərin sayında ciddi dəyişiklik müşahidə olunub.
Sfera.az Axar.az-a istinadən xəbər verir ki, bu barədə təhsil eksperti Kamran Əsədov sosial şəbəkədə paylaşım edib.
Ekspert bildirib ki, yeni imtahan modelinə keçiddən sonra 2019-2022-ci illər arasında maksimum nəticə göstərənlərin sayı çox aşağı olub:
"Bu dövrdə cəmi 13 nəfər 300 bal toplamağa nail olub. Hər il orta hesabla 2-5 nəfər bu nəticəni göstərib. Bu illər pandemiya şəraiti və test mexanizmlərindəki dəyişikliklərlə yadda qalıb. Ən maraqlı məqam isə 2023-cü ildə heç bir abituriyentin maksimum nəticə göstərə bilməməsidir".
Kamran Əsədovun fikrincə, bu, ya sualların çətinliyi, ya da qiymətləndirmə meyarlarının sərtləşməsi ilə bağlı ola bilər:
"Lakin 2024 və 2025-ci illərdə vəziyyət köklü şəkildə dəyişib. İki il ərzində ümumilikdə 98 nəfər 300 bal toplayıb – 2024-cü ildə 55 nəfər, 2025-ci ildə isə 43 nəfər”.
Ekspert bu kəskin artımı aşağıdakı səbəblərlə izah edib:
- Testlərin sadələşdirilməsi və ya süni bal artımı;
- Tədris proqramına uyğunluğun yüksəlməsi;
- Qiymətləndirmə meyarlarında yumşalma;
- Repetitor hazırlığının və test strategiyalarının effektivliyinin artması.
K.Əsədov əlavə edib ki, bu qədər sürətli dəyişiklik imtahanların obyektivliyi və şəffaflığı ilə bağlı suallar doğurur:
"Əgər bir il öncə heç kim maksimum nəticə göstərə bilmirdisə, sonrakı il bu rəqəmin 55-ə çatması ciddi izah tələb edir.
- DİM bu dəyişikliklərin səbəblərini ictimaiyyətə izah etməlidir;
- Bu cür fərqlər imtahanların etibarlılığına olan inamı zəiflədə bilər;
- 2026-cı ildə göstəricilərin necə dəyişəcəyi diqqətlə izlənməlidir".
