İmtahanda maksimum nəticə göstərən MƏKTƏBLİ -“Xəbəri göz yaşları ilə qarşıladım”

Məlum olduğu kimi, tam (11 illik) orta təhsil səviyyəsi üzrə 2 mart 2025-ci il tarixində keçirilmiş buraxılış imtahanının nəticələri elan olunub. İmtahan iştirakçıları arasında 23 nəfər 300 bal toplamaqla ən yüksək nəticəni göstərib.

 

Sfera.az imtahanda yüksək nəticə göstərmiş  Bakı şəhəri 192 nömrəli tam orta məktəbin şagirdi Ülkər Ələkbərova və Bakı şəhəri 91 nömrəli tam orta məktəbin şagirdi Abbasova Şəhanənin təəssüratlarını öyrənib.

 

Ülkər Ələkbərova qeyd edib ki, imtahandan maksimal bal toplayacağını gözləməyib:
 

“Bu mənim üçün çox sevindirici bir şey idi. Çünki aşağı siniflərdən 300 bal toplamaq kimi bir arzum var idi.  Gələcək haqqında isə onu deyə bilərəm ki, hal-hazırda lll ixtisas qrupu üzrə hazırlaşıram və hüquqşünas olmaq istəyirəm”.

 

Daha bir rekordçu Abbasova Şəhanə isə nəticəni gözyaşları ilə qarşıladığını deyib.
 

“İmtahandan sonra sualları yoxlayanda artıq 290- dan çox bal yığacağımı bilirdim, amma tam 300 olacağı barədə əmin deyildim. Həqiətən çox gözlənilməz oldu və nəticəni göz yaşları ilə qarşıladım. O an özümlə qürur duydum. Bu nəticəni həyatımda daha çox bir mərhələ olaraq qəbul edirəm.

İnanılmaz bir duyğudur. Çəkdiyin əziyyətin qarşılığını almaq mükəmməl bir hissdir. İndiyədək çox çalışdım, mübarizə apardım. Bu mübarizədə valideynlərim  və müəllimlərim  hər zaman yanımda olub dəstək göstəriblər”, - deyə o vurğulayıb.