Bu ilin ilk rübündə Mədəniyyət Nazirliyinin sistemindəki musiqi və incəsənət məktəblərində çalışan müəllimlərin bilik və bacarıqlarının qiymətləndirilməsi məqsədilə attestasiya keçirilib.

Musiqi və incəsənət məktəblərində çalışan müəllimlərin attestasiyası niyə vacibdir?

Attestasiya prosesi musiqi və incəsənət məktəblərində tədrisin keyfiyyətinə sistemli şəkildə yanaşmağın vacibliyini bir daha gündəmə gətirib. Müəllimlərin peşəkarlıq səviyyəsinin qiymətləndirilməsi məqsədilə həyata keçirilən bu proses bir tərəfdən tədris sistemindəki problemləri üzə çıxardı, digər tərəfdən isə yüksək potensiallı müəllimlərin mövcudluğunu təsdiqlədi.

Musiqi məktəblərində çalışan fortepiano müəllimlərinin attestasiyası xüsusilə əhəmiyyət kəsb edir. Çünki fortepiano müəllimlərinin orta hesabla 40 illik fəaliyyətləri dövründə 100-120, nəzəriyyə müəllimləri isə 480-500 məzun yetişdirirlər.

Bu rəqəmlər hər bir müəllimin tədris keyfiyyətinin gələcək nəsillər üçün nə qədər əhəmiyyətli olduğunu göstərir. Təəssüf ki, peşəkarlıq səviyyəsi aşağı olan müəllimlər, bu müddət ərzində yüzlərlə şagirdin inkişafına mənfi təsir göstərməklə yanaşı, uzunmüddətli problemlərin də əsasını qoyurlar.

Attestasiyadan müsbət nəticə əldə edənlər

Bakı və Abşeron-Xızı regionlarında 47 məktəbdən 1759 müəllim attestasiya prosesinə cəlb olunub. Bu, əsasən fortepiano və musiqi nəzəriyyəsi müəllimlərini əhatə edib. 2025-ci ilin fevral-mart aylarında keçirilən attestasiya nəticəsində 1183 müəllim yüksək qiymətləndirilib. Attestasiya zamanı 650 nəfər, başqa sözlə hər üç müəllimdən biri, ən yüksək nəticə ilə - 5 komissiya üzvünün hər birinin müsbət qiyməti ilə attestasiya prosesindən uğurla keçib.

Qara Qarayev adına Mərkəzi İncəsənət məktəbi, 2 saylı Rəşid Behbudov adına incəsənət məktəbin müəllimlərinin böyük əksəriyyəti attestasiyanı uğurla başa vurublar.

Attestasiya prosesinin ilk mərhələsində iştirak edən 47 məktəbdən 15 məktəbin müəllimlərinin 90%-dən çoxu attestasiyada uğur qazanıb. Son illər ərzində müəllimlərin işə qəbulu müsabiqəsində iştirak edərək işə qəbul olan müəllimlərin hamısı attestasiyadan uğurla keçib.

Uğur qazanmayan kimlərdir?

Müəllimlərin sertifikasiyaya cəlb olunması və nəticələri həmişə cəmiyyəti maraqlandırıb. Çünki istər elm, istərsə də incəsənət sahəsi olsun, gələcəkdə bu peşələrə yiyələnməyin yolu öyrədənlərin bilik və bacarığından, peşəkarlığından keçir. Musiqinin bayağılaşdığı dönəmdə peşəkarların kadr hazırlanması musiqi mədəniyyətinə töhfədir.

Ona görə də musiqi və incəsənət məktəblərində illər əvvəl qeyri-qanuni fəaliyyət göstərən “orta və ali təhsil” müəssisələrinin məzunu olmuş saxta diplomlu müəllimlərin də süzgəcdən keçirilməsi vacibdir.

Təəssüf ki, attestasiyada 492 müəllim komissiyaların qərarına əsasən tutduğu vəzifəyə uyğun hesab edilməyib. İmtahanda uyğun nəticə göstərə bilməyən müəllimlərin 86 faizi orta ixtisas müəssisələrinin məzunlarıdır. Bu müəllimlərin təkcə 300 nəfəri iki kollecin payına düşür: 135 nəfəri vaxtilə Asəf Zeynallı adına adlandırılan Bakı Musiqi kolleci və 165 nəfəri isə Sumqayıt Musiqi kollecinin məzunlarıdır.

Attestasiyadan keçə bilməyənləri nə gözləyir?

Attestasiya nəticəsində tutduğu vəzifəyə uyğun hesab edilməyən 492 müəllimdən 37 nəfərin əmək müqaviləsinə Əmək Məcəlləsinin 79-cu maddəsinə əsasən xitam verilməyəcək.

112 nəfər müəllim üçün isə faktiki olaraq ikinci şans yaradılıb. Onlar 2 lehinə və 3 əleyhinə səslə qiymətləndirildiyi üçün təlimlərə cəlb olunacaqlar. Üstəlik, həmin müəllimlər müəyyən müddətdən sonra keçiriləcək imtahandan uğurla keçərlərsə, yenidən işə qəbul olunacaqlar. Təxminən 300 nəfər müəllim isə MİQ imtahanlarında iştirak edərək daha yüksək nəticə göstərməklə təkrarən tədris sisteminə daxil olmaq imkanına malikdirlər.

Digər müsbət məqam isə təcrübəli müəllimlərlə bağlıdır. Belə ki, 60 yaşdan yuxarı və ya sağlamlıq imkanları məhdud olan müəllimlərə alternativ iş yerləri təklif olunacaq. Bundan əlavə, yerli mədəniyyət idarələri nəzdində xüsusi komissiyalar vasitəsilə uyğun olmayan nəticə göstərmiş müəllimlərlə fərdi iş aparılacaq.

Nəticələr nəyi sübut etdi?

Attestasiya prosesi göstərdi ki, musiqi və incəsənət təhsilində sistemli keyfiyyət nəzarəti olduqca vacibdir. Bu, yalnız bir yoxlama mexanizmi deyil, həm də uzunmüddətli inkişaf üçün yol xəritəsidir. Güclü müəllim heyəti olmadan güclü təhsil sistemi mümkün deyil. Bu səbəbdən şəffaflıq, obyektivlik və inkişaf yönümlü yanaşma ilə aparılan attestasiya prosesi, musiqi mədəniyyətimizin sabahı naminə mühüm addım olaraq qiymətləndirilməlidir.

Peşəkarlıq süzgəcindən KEÇMƏK – Musiqi müəllimlərinin attestasiyasının ƏHƏMİYYƏTİ