Abituriyentlərin diqqətinə: Keçid balları dəyişir

İlkin proqnozlara görə, buraxılış imtahanlarının nəticələri yüksək olacaq. Əgər blok imtahanlarında da oxşar göstəricilər əldə olunarsa, prestijli ixtisaslarda keçid ballarında 3-5 ballıq artım müşahidə edilə bilər. Bununla belə, bəzi az tələbat olan ixtisaslar üzrə keçid ballarının nisbətən aşağı olacağı gözlənilir.

Bu sözləri Sfera.az-a açıqlamasında təhsil eksperti Elçin Əfəndi builki imtahanların nəticələri ilə bağlı proqnozlarını bölüşərkən deyib.

Onun sözlərinə görə, abituriyentlər arasında aparılan sorğular da builki imtahanların əvvəlki illərə nisbətən oxşar çətinlik səviyyəsində olduğunu göstərir. Bu baxımdan, keçən ilin nəticələri nəzərə alınarsa, bu il də oxşar və ya daha yüksək nəticələr gözlənilir:

“Xüsusilə 5-ci ixtisas qrupu üzrə qəbul ballarında artımın olacağı ehtimal edilir. Çünki bu istiqamətdə qəbul birbaşa buraxılış imtahanlarının nəticələrinə əsaslanır”.

Təhsil eksperti abituriyentlər arasında aparılan sorğuların nəticələrini də bölüşüb. Belə ki, 2694 nəfər arasında keçirilən sorğunun nəticələri belədir:

- 300-dən yuxarı bal toplayanların sayı keçən ilə nisbətən daha çox olacaq;

- 251-300 bal aralığında nəticə göstərənlər – təxminən 22%;

- 201-250 bal aralığında nəticə göstərənlər – təxminən 16%;

- 151-200 bal aralığında nəticə göstərənlər – təxminən 30%;

- 100 baldan aşağı nəticə göstərənlər – təxminən 20-25%.

Qeyd edək ki, buraxılış imtahanının cavabları və ixtisas seçimi ilə bağlı yeniliklər barədə rəsmi açıqlamalar yaxın zamanda gözlənilir.