Dövlət İmtahan Mərkəzi (DİM) 2 martda tam (11 illik) orta təhsil səviyyəsi üzrə buraxılış imtahanı keçirib. Bəzi abituriyentlər sualların çətin olduğunu iddia edib.

Maraqlıdır, əgər bu iddiaların doğruluq payı varsa, blok imtahanı asan ola bilərmi?

Mövzu ilə bağlı Sfera.az-a açıqlamasında təhsil eksperti Ramin Nurəliyev bildirib ki, bu il suallar çətin olmayıb.

Onun sözlərinə görə, buraxılış imtahanında keçən ilə baxanda bir az çətinlik olduğunu desək də, əvvəlki illərlə müqayisədə asan idi.

Ekspert qeyd edib ki, çətinliyin əsas səbəbi isə bəzi sualların vaxt aparması olub:

“DİM mətnlər və dinləmələr kimi vaxt tələb edən sualları çox salıb. Çətinliyin əsas səbəbi xüsusilə, Azərbaycan dili fənnindən daha çox vaxt aparan sualların olması ilə bağlıdır. Bu hal istər-istəməz imtahanın ümumi vaxtına təsir edir. Beləliklə, imtahan iştirakçıları sualları tez cavablandırmağa məcbur olurlar. Bəziləri vaxt bölgüsünü düzgün edə bilmir, bəziləri isə tələsdiyi üçün səhv cavablar işarələyir”.

R.Nurəliyevin sözlərinə görə, bu il maksimal bal toplayanların keçən ilə nisbətdə azalacağı gözlənilir:

“Keçən il maksimal bal toplayanların sayı 53 nəfər idi. Belə ki, 3 martda 14 nəfər, 10 martda isə 39 nəfər maksimal balı toplamışdı. Burada da imtahanın çətinlik səviyyəsinin fərqini görə bilirik. Bu il 2 martda keçirilən buraxılış imtahanında maksimal bal toplayanların sayı az olacaq. Buna səbəb bəzi sualların düşündürücü olmasıdır".

Mütəxəssis sonda vurğulayıb ki, blok imtahanı daha asan ola bilər:

“Bu il plan yerlərinin sayını artırılaraq 75 minə çatacağı bildirilir. Keçən il bu rəqəm 59 min idi. Əgər plan yeri artırsa, imtahan da asan olmalıdır. Buraxılış imtahanındakı vəziyyət gərgin olsa, DİM məcbur olub blok imtahanında sualları asan salacaq. Vəziyyətin normal olacağı təqdirdə, blok imtahanı keçənilki kimi olacaq. Buraxılış imtahanlarının nəticəsindən sonda daha dəqiq proqnoz vermək mümkün olacaq”.

Firuzə Əliyeva

Bu il blok imtahanları asan olacaq? - Ekspertdən AÇIQLAMA