Ölkəmizdə ali təhsilini fərqlənmə ilə başa vuran tələbələrə xüsusi qırmızı diplom verilir. Lakin məzunlar bildirirlər ki, onların yüksək bilik və bacarıqlarının göstəricisi olaraq tanınan bu diplom əmək bazarında heç bir üstünlük təmin etmir. Buna görə də ali məktəbi fərqlənmə diplomu ilə bitirən məzunlara müəyyən güzəştlər verilməsi məsələsi son zamanlar gündəmdədir.

Maraqlıdır, bu gün universitetlərdə verilən qırmızı diplomlar tələbələrə nə vəd edir?

Mövzu ilə bağlı Sfera.az-a açıqlamasında təhsil eksperti Kamran Əsədov bildirib ki, qırmızı diplom illərdir, ali təhsil sisteminin bir simvolu kimi qalsa da, real iş bazarında heç bir üstünlük qazandırmır.

Onun sözlərinə görə, işəgötürənlər üçün artıq yüksək qiymətlər deyil, məzunların real bacarıqları, təcrübəsi və şəxsi keyfiyyətləri önəmlidir:

“Azərbaycanda hələ də qırmızı diplomlar rəsmi fərqləndirmə olaraq qalır, amma onların iş həyatında praktiki dəyəri sıfıra yaxındır. Sovet dövründən qalma bu sistem bir çox ölkədə artıq ləğv edilib və fərqlənmə yalnız akademik araşdırmalar, tədqiqatlar və tətbiqi biliklər əsasında verilir. ABŞ və Avropada universitetlər fərqləndirilməni “cum laude”, “magna cum laude” və “summa cum laude” kimi mərhələli sistemlə aparır, burada tələbənin akademik nailiyyətləri ilə yanaşı, elmi fəaliyyətləri və sosial aktivliyi də nəzərə alınır. Finlandiya və Almaniyada isə qırmızı diplom anlayışı mövcud deyil, onun yerinə məzunların bilikləri və bacarıqları konkret imtahanlar və praktiki layihələrlə qiymətləndirilir. Azərbaycanda isə bu hələ də formal bir göstərici olaraq qalır və tələbələrin iş həyatında heç bir real üstünlük qazanmır”.

Ekspert qeyd edib ki, qırmızı diplomun verilməsinin davam etdirilməsi təhsildə keyfiyyət anlayışını kölgədə qoyur və tələbələri real bilik və bacarıqlar qazanmaq əvəzinə sadəcə yüksək qiymət dalınca qaçmağa sövq edir:

“Əgər sistem dəyişməzsə, növbəti illərdə də işəgötürənlər üçün bu sənəd sadəcə kağız parçası olaraq qalacaq. Təhsil sistemində əsas dəyişiklik diplomun rəngi deyil, məzmunu olmalıdır”.

Firuzə Əliyeva

"Qırmızı diplom keyfiyyət anlayışını kölgədə qoyur..." - Ekspertdən AÇIQLAMA