Son günlər universitetlərin şəhərin mərkəzindən kənarlaşdırılması müzakirə obyekti olub.

Bununla bağlı Sfera.az-a açıqlama verən təhsil məsələləri üzrə ekspert Kamran Əsədov deyib ki, universitetlərin şəhər mərkəzindən kənar ərazilərə köçürülməsinin bir çox müsbət və mənfi nəticələri var:

“Dünyanın bir çox ölkəsində universitetlər mərkəzi hissədən kənarda yerləşdirilir. Bu təcrübənin əsas məqsədi tələbələr üçün geniş tədris və tədqiqat mühiti yaratmaq, yaşayış və nəqliyyat xərclərini optimallaşdırmaq, şəhər mərkəzində nəqliyyat yükünü azaltmaq, tələbələri daha sakit və akademik mühitdə cəmləşdirməkdir....Azərbaycan reallığında bu tətbiq edilsə, nəqliyyat və şəhər infrastrukturu yüngülləşər. Bakıda 40-dan çox ali təhsil müəssisəsi var və tələbələrin böyük hissəsi şəhərin mərkəzinə yönəlir, səhər saatlarında ictimai nəqliyyatda sıxlığın 30-40%-ni tələbələr təşkil edir. Universitetlərin şəhərdən kənara köçürülməsi bu yükü azalda bilər. Digər tərəfdən, hazırda Bakıda universitetlərin əksəriyyəti ayrı-ayrı binalarda fəaliyyət göstərir və tələbələr üçün geniş sosial, akademik və tədqiqat imkanları məhduddur. Şəhər kənarında universitet şəhərciklərinin yaradılması tələbələr üçün daha müasir, elmi və texnoloji imkanları olan geniş kampus mühiti formalaşdıra bilər. Həmçinin yaşayış və kirayə qiymətləri də optimallaşar. Bakıda tələbələrin kirayə mənzil problemi böyükdür. Şəhər mərkəzində kirayə qiymətləri 500-1000 manat arasında dəyişir və bu, çoxları üçün çətinlik yaradır. Universitetlər şəhərdən kənara köçürülsə, tələbə yataqxanalarının tikilməsi və daha ucuz yaşayış imkanlarının yaradılması mümkün ola bilər”.

Ekspert sözügedən prosesin mənfi tərəflərindən də söz açdı:

“Universitetlərin şəhərdən kənara köçürülməsi üçün müvafiq nəqliyyat marşrutları və tələbələr üçün uyğun şərait yaradılmalıdır. Əks halda, universitetlər şəhər mərkəzindən uzaqlaşsa da, tələbələr üçün ciddi çətinliklər yarana bilər. Eyni zamanda, hazırda tələbələr universitetlərdən sonra şəhərin müxtəlif sosial məkanlarında vaxt keçirirlər. Universitetlərin şəhərdən kənara köçürülməsi bu imkanı azalda bilər və tələbələrin sosiallaşması zəifləyə bilər. Xüsusilə humanitar və sosial elmlər sahəsində fəaliyyət göstərən universitetlər üçün şəhər mərkəzində yerləşmək daha əlverişli ola bilər. Diplomatiya, beynəlxalq münasibətlər və biznes sahələri üzrə təhsil alan tələbələr üçün mərkəzdə olmaq müəyyən üstünlüklər yaradır. Ümumiyyətlə, universitetlərin şəhərdən kənara köçürülməsi yaxşı planlaşdırılmalı, nəqliyyat və sosial infrastruktur düzgün qurulmalıdır. Əgər kampus universitet modeli yaradılmasa, tələbələr üçün əlavə çətinliklər meydana çıxa bilər. Düzgün planlaşdırılarsa, bu addım həm Bakının yükünü azaldar, həm də universitetlər üçün yeni inkişaf perspektivləri açar”.

Günay

"Düzgün tənzimlənməsə, tələbələrə problem yaradacaq" - Ekspert səbəbləri SADALADI