Bu il 20 minədək müəllimin sertifikatlaşdırmaya cəlb olunması nəzərdə tutulub. Qeyri-rəsmi məlumata görə, 2025-ci ildə tarix və coğrafiya müəllimləri sertifikasiya imtahanı verəcək.

Müəllimləri ən çox maraqlandıran məsələlərdən biri də sertifikasiyadan keçən şəxslərin əməkhaqqında artımın necə hesablanması mövzusudur.

Sfera.az bildirir ki, Nazirlər Kabinetinin müvafiq qərarına əsasən, sertifikatlaşdırmanın nəticəsinə uyğun olaraq test imtahanı mərhələsində 50 baldan yuxarı nəticə göstərən müəllimlərin vəzifə maaşına 35 faiz, keçid balını (30 bal) toplayan müəllimlərin vəzifə maaşına isə 10 faiz aylıq əlavələr edilir.

Bu gün ölkədə sertifikasiya imtahanından uğurla keçən müəllimin orta aylıq əməkhaqqı 1300 manatdır.

Qeyd edək ki, müəllimlərin maaşının hesablanmasına bir çox faktor təsir edir. Müəllimin təhsil səviyyəsi, elmi dərəcəsinin olması, işlədiyi təhsil müəssisəsi, əmək şəraitinin ağır və zərərliliyinə görə ödənilən əlavələr, pedaqoji profilli ali və orta ixtisas təhsili müəssisələrini bitirmiş yaşı 35-dək olan gənc mütəxəssislərin rayon və kəndlərdə yerləşən ümumi təhsil müəssisələrinə işə cəlb olunmasının stimullaşdırılması üçün ödənilən əlavələr və vergi güzəştləri də bu məbləğə təsir edir.

Sertifikasiyadan keçən müəllimlərin həftəlik dərs saatına əsasən, maaşının minimum məbləğdə hesablanma qaydası aşağıdakı kimidir:

Prosesdən keçən və həftəlik 6 saat dərs yükü olan müəllimin maaşı 200 manatdırsa, ona 10% əlavə olunduqda 220, 35% əlavə olunduqda isə 270 manat təşkil edəcək.

6 saatdan 12 saata qədər dərs yükü olan müəllimin əməkhaqqı 400 manatdırsa, ona 10% əlavə olunduqda 440, 35% əlavə edildikdə isə 540 manat təşkil edəcək.

12-18 saat aralığında dərs yükü olan müəllimin maaşı 600 manatdırsa, sertifikasiyadan keçdikdən sonra onların məvacibi 10% əlavə ilə 590, 35% əlavə tətbiq edildikdə isə 720 manat təşkil edəcək.

18-24 saat aralığında dərs yükü olanların əməkhaqqı 800 manatdırsa, 10% əlavə tətbiq edildikdə məvacib 880, 35% əlavə olunduqda isə 1080 manat olacaq.

Eyni zamanda 24 saatdan artıq dərs yükü olanların əməkhaqqı 1500 manatdırsa, 10% əlavə olunduqda onlar 1650, 35% əlavə tətbiq edildikdə isə 2025 manat əməkhaqqı alacaqlar.

Daha dəqiq hesablama üçün Elm və Təhsil Nazirliyinin saytında yerləşdirilən dövlət ümumi təhsil müəssisələrində çalışan müəllimlərin əməkhaqlarının hesablanması üçün onlayn kalkulyatorundan istifadə edə bilərsiniz:

//edu.gov.az/az/calculator

Xatırladaq ki, 2022-2024-cü illərdə ibtidai sinif, Azərbaycan dili və ədəbiyyatı, riyaziyyat, infomatika, xarici dil (ingilis dili, rus dili, Azərbaycan dili (rus bölməsi), alman dili, fransız dili) fənlərini tədris edən 65 minə yaxın müəllim sertifikalaşdırmadan keçib.

Elm və Təhsil Nazirliyinin məlumatına görə, 2026-cı ilə qədər 135 min təhsilverənin sertifikatlaşdırmaya cəlb olunması planlaşdırılır.Həmçinin son illərdə təhsilə ayrılan dövlət büdcəsində əhəmiyyətli artımlar müşahidə olunur: 2023-cü ildə 4.3 milyard manat olan təhsil büdcəsi 2024-cü ildə 4.9 milyard manata çatıb və 2025-ci ildə bu rəqəmin 5.3 milyard manata yüksələcəyi gözlənilir.

Statistik məlumatlara əsasən, hazırda müəllimlərin orta aylıq əməkhaqqı 600-800 manat civarındadır. Sertifikatlaşdırmadan keçən müəllimlər isə əlavə olaraq 10%-dən 35%-ə qədər bonus alırlar. 2025-ci ildə maaşların 15%-dən 20%-ə qədər artacağı proqnozlaşdırılır ki, bu da müəllimlər üçün orta hesabla 100-160 manat əlavə gəlir deməkdir. Məsələn, hazırda 800 manat maaş alan bir müəllim artımdan sonra təxminən 920-960 manat arası əməkhaqqı əldə edə bilər.

Firuzə Əliyeva

Sertifikasiyadan keçən müəllimlərin maaşı bu qədər ARTACAQ - MƏBLƏĞLƏR