DİM hansı imtahanların rəqəmsal formada keçirə bilər? - AÇIQLAMA
Dövlət İmtahan Mərkəzinin İdarə Heyətinin sədri Məleykə Abbaszadə ötən günlərdə açıqlamasında bildirmişdi ki, yaxın gələcəkdə imtahanlar rəqəmsal formada keçiriləcək. Onun sözlərinə görə, DİM yavaş-yavaş rəqəmsal qiymətləndirməyə keçid edir.
Bu fikir bəzi təhsil işçilərini və abituriyentləri sevindirib. Digər tərəfdən, hansı imtahanların rəqəmsallaşacağı da maraq doğurur.
Mövzu ilə bağlı Sfera.az-a açıqlama verən təhsil eksperti Ramin Nurəliyev bildirib ki, kütləvi imtahanların rəqəmsal formada keçirilməsi hazırkı vəziyyət üçün real görünmür:
“DİM abituriyentlər üçün buraxılış və blok, magistr imtahanı, MİQ imtahanı kimi böyük kütlənin girdiyi imtahanı, yaxud da nazirliyin keçirdiyi sertifikasiya kimi imtahanları rəqəmsal formada keçirmək iqtidarında deyil. Hazırda DİM-in imkanları 500, maksimum 1000 nəfərlik imtahanları rəqəmsal formada keçirmək imkanına malikdir. Mən düşünürəm ki, böyük imtahanları keçirmək üçün DİM-in hazırkı imkanlarının 30 qatı lazımdır. Yaxın gələcəkdə də bu görünmür. Çünki bir çox inkişaf etmiş ölkələrdə belə böyük imtahanların rəqəmsallaşdırması yoxdur və bu kimi çətin və uzun müddətli fəaliyyətin qısa müddətdə bizdə olacağına ümid etmirəm.Bir-iki kiçik imtahanların rəqəmsal təşkili o demək deyil ki, DİM bütün imtahanları rəqəmsallaşdıracaq.Düşüncə çox gözəldir, amma icraat bir az çətin görünür”.
Firuzə Əliyeva
