Beynəlxalq Təhsil MərkəzindənYENİ TƏKLİF– Gənclərin karyera imkanlarını genişləndirmək üçün MÜHÜM FÜRSƏT

Beynəlxalq Təhsil Mərkəzi (BTM) gənclərin karyera planlaşdırılmasında strukturlaşdırılmış və effektiv yanaşmaların tətbiqini nəzərdə tutan layihə hazırlanmasını təklif edir.

Sfera.az xəbər verir ki, BTM-in sədri Ramal Şəmşədli tərəfindən təklif olunan layihə beynəlxalq təcrübəni özündə əks etdirir.

Layihənin əsas hədəfi gənclərin təhsil aldıqları müddətdə öz maraqlarını, bacarıqlarını və əmək bazarının tələblərini düzgün başa düşərək gələcəklərini qurmasına kömək etməkdir. 

Layihədə məktəb və universitetlərdə Karyera Məsləhət və Dəstək Mərkəzlərinin yaradılması, praktiki təcrübə və şəbəkələşmə, mentorluq proqramlarının hazırlanması, işə hazırlıq seminarlarının təşkili kimi məsələlər öz əksini tapıb.

Bundan əlavə, gənclərin bacarıqlarını dəyərləndirmək üçün peşə testləri və maraqların qiymətləndirilməsi proqramlarının təşkili nəzərdə tutulur. Gənclərin karyera planlaşdırması üçün xüsusi onlayn platformaların yaradılması da layihədə öz əksini tapıb.

Şagird və tələbələrin əmək bazarı ilə bağlı dəqiq məlumatlara yiyələnməsi üçün layihə çərçivəsində əmək yarmarkalarının, biznes planlaşdırma təlimlərinin təşkili nəzərdə tutulub. Eyni zamanda gənclərin karyera imkanlarını genişləndirmək üçün rəqəmsal alətlərdən istifadə olunması və bu prosesdə valideynlərin rolunun gücləndirilməsi üçün maarifləndirici görüşlərin keçirilməsi layihədə öz əksini tapıb.

Bu yanaşmalar gənclərin daha məqsədli və hazırlıqlı şəkildə karyera seçimlərini etməsinə kömək etmək məqsədi daşıyır.Məktəblər və universitetlər isə belə tədbirlər vasitəsilə təhsil verməklə yanaşı, eyni zamanda gələcək liderlərin inkişafına da şərait yaradacaqlar.