Məktəb hər bir insanın çox önəmli illərini əhatə edir. Məktəb şagirdləri ağuşuna alır, bəsləyir, bilik-bacarıqlarını artırır, şəxsiyyət kimi formalaşdırır, gələcək müstəqil həyata hazırlayır.

Məhz bu baxımdan "Son Zəng" hər bir şagirdin həyatında dönüm nöqtəsi qədər mühümdür. Çünki bu zəngdən sonra artıq onlar öz istədikləri peşəyə yiyələnmək üçün müstəqil addımlar atırlar.

Bu gün son zəng sədalarının səsləndiyi məktəblərdən biri də 250 nömrəli məktəb idi. Məktəbin demək olar bütün kollektivi həm sevincli həm də biraz hüznlü idi.

Elə bu məktəbi daha yaxından tanımaq üçün məktəbin direktoru Gülanə Əliyeva ilə söhbətləşdik.

"Bu məktəbə yeni direktor təyin olunmuşam. Avqust ayında bu məktəbdə direktorluq fəaliyyətimin bir ili tam olacaq. Bu "Son Zəng" mənimüçün məhz bu baxımdan çox önəmlidir. Bu ilə buraxılış sinifləri üzrə yüksək nəticələr əldə etmişik. 9-cu sinif üzrə 19 nəfər, 11-ci sinif üzrə isə 24 şagirdimiz 200 baldan yuxarı bal toplayıblar. Prezident təqaüdünə və 10 qırmızı attestata namizəd şagirdlərimiz var. Həmçinin bu il rayon səviyyəsində keçirilən brain ring bilik yarışında müəllimlərimlərimiz ikinci yerə layiq görülüb".

Gülanə Əliyeva xüsusilə məktəbin 3 şəhid məzunundan danışıb:

"Şəhid Elton Qasımov, şəhid Daşdəmir Paşayev və şəhid İlkin Rzayev məktəbimizin şagirdləri olublar. Bugün onların valideynləri bizim Son Zəng tədbirimizdə iştirak etdilər. Müəllimlərdən dinlədiyim qədər, onlar məktəbin ən nümunəvi şagirdləri olublar. Müəllimlərin rəğbətini və sevgisini qazanıblar. Bugün də onların ailəsini tək qoymuruq. Daima onlar baş çəkirik".

Məktəb direktoru son olaraq "Son Zəng"lə bağlı təəssüratlarını bölüşüb:

"Bugün biz "Zəfər Flashmobu" ilə birliyimizi nümayiş etdirdik. Məzunlarımız məktəbə çox bağlıdırlar və məktəbdən ayrılmaq istəmirlər. "Son Zəng" onlar üçün formal xarakter daşıyır. Hər bir şagirdimiz bizim üçün çox dəyərlidir. Biz şagirdləri akademik bacarıqlarına və qiymətlərinə görə fərqləndirmirik. Bu da bizim nəticələrimizə təsir edən amillərdən biridir. Mən bundan sonrakı həyatlarında onlara uğur arzulayıram".

Şəhid Daşdəmir Paşayevin anası Mələykə Paşayeva da Son Zəng tədbiri ilə bağlı öz təəssüratlarını bölüşüb:

"Bu məktəb mənim üçün çox əzizdir. Çünki bu məktəbdə mənim oğlum 8 il təhsil alıb. Daha sonra hərbi sahə üzrə Bakı Ali Birləşmiş Komandanlıq Məktəbində təhsilini davam etdirib. O hərbidə baş leytenant rütbəsini daşıyıb. Müharibə başlayanda könüllü olaraq vətən uğrunda döyüşlərə qatıldı. O arxada 4 övladını bizə yadigar qoydu. O bütöv Azərbaycan uğrunda şəhid oldu və bütün uşaqlar yaşasın deyə 4 uşağını atasız qoydu. Bu gün məzun adını alan bütün şagirdləri təbrik edirəm".

Məktəbin məzunları da bu gözəl gündə öz hisslərini və gələcək arzularını bölüşüblər.

Məzun Həcər Əliyeva və İlhamə Süleymanova üzərlərində əməyi olan hər bir müəllimə dərin təşəkkürlərini bildiriblər.

Həcər tibb bacısı, İlhamə isə aktrisa olmaq istədiyini və bu peşəyə yiyələnmək üçün səbrsizləndiklərini bildirdi.

Beləliklə "Son Zəng" sədaları altında onbirincilər məktəblə vidalaşdılar. Onlara 11 ilin acılı şirinli xatirələri yadigar qaldı.

"Son Zəng" yeni mərhələnin başlanğıcı, bitib- tükənməyən arzuların, hədəflərin reallaşmağına doğru gedilən bir aləmin astanasıdır. Bu zəng məzunları yeni müstəqil həyatla mübarizəyə, müvəffəqiyyətlərə yola salır.

Ülkər Abdurahmanlı
Anar Bayramlı

3 şəhidimizin şagirdi olduğu məktəbdən REPORTAJ