“Məktəbli könüllü” proqramının açılış mərasimi keçirildi - FOTOLAR
Bu gün “Məktəbli könüllü” proqramının rəsmi açılış mərasimi keçirilib.
Sfera.az bildirir ki, tədbir 132-134 nömrəli Təhsil Kompleksində baş tutub. Tədbirdə Elm və Təhsil Nazirliyinin yanında Məktəbəqədər və Ümumi Təhsil üzrə Dövlət Agentliyinin sədr müavini Orxan Abbasov, “Bir Könüllü” Tələbə Təşkilatının rəhbəri Leyla Zeynalova, Elm və Təhsil Nazirliyinin Uşaqların Müdafiəsi İdarəsinin rəis müavini Günel Səfərova çıxış edib.
Tədbirdə proqramın məqsəd və vəzifələri, eyni zamanda növbəti yarım il üzrə fəaliyyət planı ictimaiyyətə təqdim olunub.
“Məktəbli könüllü” proqramı “Bir Könüllü” Tələbə Təşkilatının təşəbbüsü, Elm və Təhsil Nazirliyinin dəstəyi, ictimai fəal və sosial məsuliyyətli məktəbli profilinin formalaşdırılması məqsədi ilə ümumi təhsil müəssisələrinin 8, 9, 10, 11-ci sinif şagirdlərinin ölkədə ilk dəfə sistemli şəkildə könüllü fəaliyyətə cəlb olunmasını həyata keçirən xüsusi bir proqramdır. İlkin mərhələdə pilot şəkildə yalnız Bakı, Xırdalan və Sumqayıt məktəblərini əhatə edir. Növbəti illərdə region məktəblərinin də prosesə cəlb olunması nəzərdə tutulub.
Bu günə qədər proqrama ümumilikdə 1000-dən çox müraciət daxil olub. Qeydiyyat prosesini uğurla tamamlayan 750 şagird müsahibəyə dəvət edilib ki, onlardan artıq 350 nəfəri proqram üzvlüyü haqqı qazanıblar.
Qeyd edək ki, müraciət prosesi aprel ayının 1-dən etibarən yenidən açıq elan olunacaq.
Günay
