Son zamanlar hazırlıq kurslarının qiymətləri olduqca yüksəlib. Bunu da əsasən dərsin keyfiyyəti və digər sahələrdəki qiymət artımı ilə əlaqələndirirlər.

Lakin bir sıra magistratura kursları var ki, 45-50 manata 3 fənni tədris edirlər.

Bəs bu kursların qiymətlərinin aşağı olması nə ilə əlaqəlidir?

Mövzu ilə bağlı Sfera.az-a danışan təhsil eksperti Kamran Əsədov bildirib ki, ali təhsil müəssisələrinin magistratura pilləsinə qəbul, universitetlərdə qazanılan biliklərin yox, kənar biliklərin yoxlanılması üçündür.

"Məhz bu baxımdan universitetin bakalvr pilləsini bitirən məzunlar magistraturaya qəbul olmaq üçün mütləq hazırlıq kurslarına müraciət etməlidirlər. Bunun başqa alternativi yoxdur. Hazırlıq kursları da onların kifayət qədər böyük vəsait itirməsinə səbəb olur".

Ekspert qeyd edib ki, aşağı qiymətə xidmətlər təklif edən kurslar o qədər də keyfiyyətli olmur.

"Bu kurslar əsasən təcrübəsiz müəllimləri dərslərə cəlb edirlər. Aşağı qiymətə təklif edilən dərslərin effektiv nəticələri olmur. Azərbaycanda orta statistik rəqəmlərə əsasən, bir fənnin hazırlıq qiyməti 40-50 manatdır".

Kamran Əsədov son olaraq əlavə edib ki, magistratura imtahanları çox çətindir. "Fərdi qaydada hazırlaşıb uğur əldə etmək imkansızdır".

Ülkər Abdurahmanlı