Azərbaycanda repetitor fəaliyyəti olduqca geniş yayılıb. Fərdi hazırlıq qiymətlərində isə artım müşahidə olunur.

Bəs bu qiymət artımının səbəbi nədir?

Mövzu ilə bağlı Sfera.az-a danışan təhsil eksperti Elşən Qafarov bildirib ki, repetitor fəaliyyətindəki qiymət artımı ölkənin digər sahələrində baş verən bahalaşma ilə əlaqəlidir. “Xidmət sektorundakı qiymətləri bazar müəyyən edir. Əsasən Bakı və ətraf şəhərlərdə qiymətlər baha olduğu üçün, repetitorluq fəaliyyətinin qiymətləri də yüksəkdir”.

Ekspert bildirib ki, müvafiq qruplar üzrə İnformatika və Coğrafiya fənninin əlavə olunması da qiymətlərə təsirsiz ötüşməyib. “Bu isə qiymətlərin 30 % bahalaşmasında böyük rol oynayıb”.

Məsələ ilə bağlı təhsil eksperti Elçin Əfəndi isə bildirib ki, repetitor hazırlığı nəzarət olunmayan sistemdir. “Düşünürəm ki, bu istiqamətdə nəzarət mexanizmi yaradılarsa, qiymətləri tənzimləmək olar. Bu fəaliyyətlə məşğul olan şəxslər vergi ödəyicisi deyillər. Məhz buna görə də, istənilən qiyməti təyin edirlər. Bu fəaliyyət növü açıq bir bazardır. Valideynlərin də bir çoxu bu vəziyyətdə daha ucuz repetitor axtarışına çıxırlar”.

Elçin Əfəndi son olaraq əlavə edib ki, qiymətlərin enməsi gözlənilmir.

Ülkər Abdurahmanlı