Tətildən sonra şagirdləri məktəbə necə adaptasiya etmək olar? - Valideynlərə MƏSLƏHƏT

Yay və bayram tətillərindən sonra bəzi şagirdlər məktəbə adaptasiya prosesində çətinlik çəkirlər.

Bəs bu problemin təməlində nə durur və həlli üçün nələr edilməlidir?

Məsələ ilə bağlı Sfera.az-a açıqlamasında Abşeron rayonu Xırdalan şəhər 1 nömrəli məktəbin psixoloqu Ülviyyə Hüseynli bildirib ki, şagirdlərin yenidən məktəbə adaptasiyası maksimum 1 ay çəkir:

“Ümumiyyətlə, adaptasiya problemi daha çox 1-ci sinifə başlayan uşaqlarda rast gəlinir. Buna baxmayaraq, bəzən tətildən sonra da şagirdlər məktəb mühitinə uyğunlaşmaqda çətinlik çəkirlər, hətta dərsə gəlmək istəməyənlər də olur. Uşaqların 90 faizi tətil zamanı istədiyi zaman yatır, durur, telefonla oynayır, çölə çıxır, gəzir və dostları ilə görüşür. Beləliklə, evdəki rahatlığa tez öyrəşir və tənbəlləşirlər. 

Lakin şagirdlərin yenidən məktəbə adaptasiya prosesi çox vaxt almır, 2-3 həftə, maksiumum 1 ay çəkir. Yenə də bu prosesi sürətləndirmək üçün valideynlər yeni dərs ili və ya dövrü üçün uşaqları həvəsləndirməlidirlər. Yaxşı olar ki, tətil zamanı gəzməyə çıxanda belə ən azından, məktəb ərazilərindən keçsinlər və şagird məktəbi o müddətdə də görsün ki, təmamilə unutmasın”.

Firuzə Əliyeva