"Hazırda Bakı şəhərində təhsilalanların sayı çoxdur və bu bir sıra problemlərin yaranmasına səbəb olur.Bakı şəhərində 39 ali təhsil müəssisəsi yerləşir və bu universitetlərdə 133.526 tələbə təhsil alır.  Həmçinin orta məktəblərdə, kollec və peşə təhsili müəssisələrində də təhsil alanların sayı az deyil".

Sfera.az xəbər verir ki, bunu təhsil eksperti Kamran Əsədov deyib.

Onun sözlərinə görə, bu qədər insanın gün ərzində hərəkəti ictimai nəqliyyatda sıxlığı artırır:

“Fikrimcə, mərkəzi ərazilərdə peşə təhsili müəssisələri və kolleclər olmamalıdır. Kollec və peşə təhsili müəssisələrinin yalnız bölgələrdə olması daha məqsədəuyğundur.Sıxlıq problemini arada qaldırmaq üçün Bakı şəhərində yerləşən ali məktəblərin plan yerləri ciddi şəkildə azalmalı, əvəzində həm bölgələrdə yeni universitetlər açılmalı,həm də  mövcud universitetlərin plan yerləri artırılmalıdır”. 

Ekspert bildirib ki, bu nöqteyi-nəzərdən “Bakının 2040-cı ilədək inkişafına dair Baş planı”nda təhsilin inkişafı istiqamətində görüləcək işlər misilsiz rol oynayacaq:

"Həmin plana əsasən, "Universitet şəhərciyi” - yeni bilik-biznes rayonu, dövlət və özəl ali təhsil müəssisələri üçün ümumi bilik mərkəzi yaradılacaq. Zirə qəsəbəsində kənd təsərrüfatı və aqrar-sənaye müəssisələrinin işçi qüvvəsi ilə təmin edilməsi üçün peşə təhsili mərkəzi mədəni və sənaye irsi əyləncəli-təhsil Parkı fəaliyyət göstərəcək”.

Ülkər Abdurahmanlı