Qloballaşan dünyada cəmiyyətin yüksəliş tendensiyaları innovasiyaların inkişafı ilə sıx bağlıdır. Lakin elm və təhsil müasir innovasiyalardan geri qalır.

Bu geriləmənin səbəbi nədir?

Mövzu ilə bağlı Sfera.az-danışan təhsil eksperti Kamran Əsədov bildirib ki, elm və təhsilin müasir innovasiyalardan geri qalmasının səbəbi qanunvericilik aktları ilə bağlıdır:

“Qanun və qaydalarda olan məhdudiyyətlər yeniliklərin çevik tətbiqinə maneə yaradır. Misal üçün, bir müddət əvvəl Azərbaycanda yüksək səviyyədə SAF 2023 festivalı keçirildi. Burada STEAM çərçivəsində hazırlanmış maraqlı texniki avadanlıqlar var idi. Böyük qismi DRON ilə bağlı texnikalar idi.  Bu məqamda sual yaranır ki, şagird bu dron avadanlığını harada uçursun? Dronu uçurmaq üçün 10-dan çox dövlət qurumundan icazə almaq lazımdır”.

Ekspert qeyd edib ki, əgər bir innovativ yenilikləri tətbiq etmək istəyiriksə, öncə onun qanunvericilik bazasını hazırlamalıyıq.

“3 ildir ki, həm pandemiya dövründə, həm müharibə zamanı, həm də indi qızılca xəstəliyi dövründə tam və qismən tədris onlayn-distant rejimdə həyata keçirilir. Amma indiyə qədər distant təhsilin qanunvericilik aktlarını qəbul etməmişik. Özümüz onlayn-distant təhsili veririk, amma xarici ölkələrdə bu formada təhsil alanların diplomunu tanımırıq”.

Ülkər