Məktəblilərin bir çoxu dərsdə telefonla oynayır, müəllimi dinləmirlər.

Maraqlıdır, bu kimi halların artmasının səbəbləri nədir?

Mövzu ilə bağlı Sfera.az-danışan təhsil eksperti Elşən Qafarov bildirib ki, əsas səbəblərdən biri müəllimlərin idarəçilik qabiliyyətinin zəifliyi, məktəblərdə nizam-intizamın olmamasıdır:

“Tədris ilinin əvvəlində Pedoqoji Şurada məktəblər üçün nizam-intizam qaydaları müəyyən olunmalı və şagirdlərin yaş dövrləri nəzərə alınmalıdır. Bu tip hallar baş verən məktəblərdə direktorların üzərinə böyük məsuliyyət düşür. Nizam-intizama məktəb direktorları nəzarət etməlidir”.

Ekspert qeyd edib ki, dərsi dinləməyən və telefonla oynayan şagirdlərin valideynləri ilə də sıx əlaqədə olmaq lazımdır. Məktəb psixoloqunun bu məqamda rolu əvəzedilməzdir. Sözügedən uşaqlara dərsdən əlavə psixoloji seanslar təşkil etməlidir:

“Şagirdlərin özləri ilə məktəbə telefon gətirmələri düzgün deyil. Sadəcə, hazırlığa gedən zaman telefon götürmək məqbul hesab olunur. Məktəblərdə həm müəllimlər, həm valideylər üçün maarifləndirmə işləri aparılmalıdır.

Ülkər Abdurahmanlı