“Pullu”ya düşənlər ödənişsiz plan yerlərinə qəbul oluna bilərmi? – “Mümkündür, amma gərək...\"

Ali təhsil müəssisələrinə ixtisas seçimi nəticələri açıqlanıb. Bəzən abituriyentlər yüksək bal toplamalarına baxmayaraq, kodlaşdırmada yanlışlığa yol verdiklərinə görə ödənişli əsaslı ixtisaslara qəbul olunurlar. Bəs həmin abituriyentlər yenidən müraciər edərək, dövlət sifarişli plan yerlərinə qəbul oluna bilərlərmi?

Mövzu ilə bağlı Sfera.az-a açıqlamasında təhsil eksperti Ramin Nuraliyev bildirib ki, əgər topladığı bal imkan verirsə ödənişli əsaslarla tələbə adını qazanmış şəxslər dövlət sifarişli yerlərə köçürülə bilər. Amma bunun üçün bəzi şərtlər də ödənməlidir:

“Əgər abituriyent səhv kodlaşdırma ucbatından dövlət sifarişli yox, ödənişli ixtisasa qəbul olunubsa və dövlət sifarişli yerlər tam dolmayıbsa, köçürmə edilə bilər. Sadəcə, valideyn Elm və Təhsil Nazirliyinə və Dövlət İmtahan Mərkəzinə rəsmi müraciət etməlidir. Müraciət əsasında ödənişli əsaslarla qəbul olan abituriyent dövlət sifarişli əsaslı yerlərə köçürülə bilir. Əgər yer yoxdursa, bu mümkün deyil”.

Ekspert qeyd edib ki, hazırda Azərbaycan Tibb Universitetində dövlət sifarişli boş yerlər var:

“Hazırda, bu şəkildə boş dövlət sifarişli yeri olan ali təhsil məktəblərdən biri ATU-dur. Balı yüksək olan, amma kodlaşdırmada ödənişli yerləri yazan abituriyentlər müraciət edərək dövlət hesabına təhsil ala bilərlər.”

Firuzə Əliyeva