"Müəllimlərin sertifikatlaşdırılması irəli sürülür, lakin bununla bağlı ədəbiyyat, test yoxdur". 

Sfera.az xəbər verir ki, bunu deputat Siyavuş Novruzov bildirib. Millət vəkili müəllimlərin sertifikasiya imtahanından danışıb:

"Müəllim bilmir ki, imtahana hazırlaşanda haradan oxumağa başlasın. Abituriyentlər üçün proqramlar olur, onlar bilir ki, imtahana necə hazırlaşmaq lazımdır. Lakin müəllimlərdə belə deyil. Sertifikatlaşdırmanı 3il müddətinə salırıq, lakin bu 5 il müddətinə olmalıdır. 3 il sonra sertifikasiya imtahana gedən müəllimlə getməyən müəllimin maaşı arasında fərq olmalıdır". 

Deputat “Peşə təhsili haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsinin müzakirəsi zamanı peşə məktəblərinin açılmalı olduğunu qeyd edib:

"Bütün nazirliklər universitet açır, amma peşə məktəbi açan yoxdur. Peşə texniki təhsili vacib olan sahədir. Belə məktəblər çox olsa, gənclərin çoxu universitetlərə üz tutmaz. Sumqayıt sənaye şəhəridir, bu şəhərdə peşə texniki məktəblər açılmalıdır. Bu istiqamətdə təkliflər verilməlidir".

Əzizə Zeynal