“Məktəblilərin psixoloji pasportu hazırlansın!” - TƏKLİF
“Hər bir şagirdin psixoloji pasportu hazırlanmalıdır”.
Sfera.az bildirir ki, bunu təhsil məsələləri üzrə ekspert Kamran Əsədov deyib.
O qeyd edib ki, sözügedən pasport onun sosial və psixoloji profilinin yaradılmasına kömək edən sənəddir:
“Bu sənəd şagirdin davranışının və mövqeyinin təhlil edilməsinə imkan verir və onun problemləri, potensialı haqqında məlumat toplamağa yarayır. Psixoloji pasportun hazırlanması üçün ilk olaraq şagirdlərin davranışının, valideynləri və sinif yoldaşları ilə münasibətlərini, məhsuldarlığını və sosial münasibətlərini qiymətləndirmək üçün müəllimlər, psixoloqlar və valideynlər tərəfindən müşahidələr aparılmalıdır. Bu müşahidələr zamanı şagirdin güclü və zəif tərəfləri dəqiq şəkildə müəyyənləşdirilməlidir. Sonra şagirdin mövqeyi və psixoloji profilinin yaradılması üçün bu məlumatlar əsasında təhlil hazırlanmalıdır. Bu təhlil şagirdin mövqeyi və təhsil vəzifələrinə necə cavab verdiyini dəqiqləşdirəcək, potensialını və problemlərini müəyyən edəcək”.
Ekspert bildirib ki, psixoloji pasportun hazırlanması zamanı valideynlərin və digər mənbələrin müvafiq icazələri əldə edilməlidir:
“Bu sənəd şagirdin maraqları, istəkləri, inkişaf potensialı və problemləri haqqında ətraflı məlumat verməlidir. Psixoloji pasport şagirdin təhsil və inkişafında köməkçi bir vasitə olaraq istifadə edilə bilər. Hər bir şagirdin psixoloji pasportu olarsa, artıq onun atacağı addımları, sərgiləyəcəyi davranışları öncədən proqnozlaşdırmaq olar”.
Türkan