Ötən gün imtahanda bəzi abituriyentlərin üzərində kəsici-deşici vasitələrin aşkarlanması sosial mediada müzakirələrə səbəb olub. Qeyd olunub ki, təkcə imtahan prosesi zamanı deyil, təəssüf ki, son zamanlar məktəblərdə də üzərində kəsici alətlər, soyuq silahlar daşıyan şagirdlərə rast gəlinir. Kimisi valideyni günahlandırır, kimisi də müəllimi və ya məktəbin rəhbərliyini...

Bununla bağlı Sfera.az-a açıqlama verən təhsil məsələləri üzrə ekspert Kamran Əsədov deyib ki, son üç ildə abitruyentlərin  imtahan binasına əlavə avadanlıqlar, köməkçi vasitəsləri gətirməsi halları çoxalıb:

“Halbuki  iştirakçılar mühafizə xidməti tərəfindən ciddi şəkildə yoxlanılır. Əvvəllər şagirdlər telefon keçirməyə çalışırdılarsa, indi ağıllı saatlar, qulaqcıqlar, uzaqdan dinləməni həyata keçirə bilən qurğular aparırlar.  Diqqətçəkən məqam ondan ibarətdir ki, orta ümumtəhsil müəssisələrinin şagirdləri daha da peşəkarlaşıblar. Onlar üst geyimlərinin üzərinə texnoloji avadanlıqları əlavə edə bilirlər. Məktəblər bilikli şagird yetişdirə bilməsə də, köməkçi vasitələrdən istifadə edə bilən şagird yetişdirə bilib. Təəccüblüsü odur ki, onlar imtana kəsici-deşici alətlər – bıçaq, təsbeh və.s keçirirlər. Sanki onlar filmlərdə canlandırılan mafiya üzvü obrazlarıdırlar. Elm və Təhsil Nazirliyi onlarda “şagird” deyil, “kriminal aləmin mütəxəssisi” obrazını yarada bilib. Təbii ki, abitruyentin imtahanda bıçaqdan, təsbehdən və ya digər kəsici vasitədən necə istifadə edə biləcəyinin heç bir elmi açıqlaması yoxdur”.

Müsahibimiz qeyd edib ki, sözügedən hadisə orta məktəblərdə şagirdlərlə bağlı ciddi problemin olduğunu göstərir:

“İmtahana əvvəllər telefonla gələn uşaqların indi bıçaqla gəlməsi dəhşətli haldır. Bu onun göstərir ki, orta məktəblərdə şagirdlər kriminal aləmə meyillənirlər. Təəssüf ki, son dövrlərin statistik göstəricilərinə nəzərə salanda görürük ki, azyaşlı uşaqların, yeniyetmələrin iştirakı ilə xüsusi amansızlıqla törədilən cinayətlərin sayında artım müşahidə edilir. Məktəblərə nəzarət edilmir. Birmənalı şəkildə buna qarşı mübarizə aparılmalıdır. Qeyd edim ki, Dövlət İmtahan Mərkəzi şagirdlər imtahan binasına daxil olan zaman təkcə əllə yoxlanış keçirmir, eyni zamanda müəyyən avadanlıqlardan da istifadə edir. Amma şagirdlər texnologiyanı aldada bilən mütəxəssis olaraq yetişiblər. Hətta onlar ağıllı saatları, texniki əşyaları o qədər fərqli formada gizlədə və istifadə edə bilirlər ki, hətta müasir dövrün innovativ avadanlıqları belə bunu bəzən müəyyənləşdirə bilmir. Düşünürəm ki,  bununla bağlı cəza olmalıdır. Düzdür, biz onların azyaşlı olduğunu deyirik, hər halda imtahana kənar avadanlıqlar aparmaq üçün hazırlaşmağa vaxt sərf etmək yerinə, oxusaydılar daha yaxşı olardı. Uşaqlarla maarifləndirmə işləri aparılmalıdır. Həmçinin onların bir il yox, bir neçə illiyə imtahanda iştirakı məhdudlaşdırılarsa, yəqin ki, bu cür hallara yol verməzlər”.

Günay Rəsulqızı