“Test üsulu ali məktəblərə qəbulda rüşvət piramidasının sındırılması üçün çox vacib addım idi. Ancaq heç bir halda uzunmüddətli və toxunulmaz formada qalmamalı idi”.

Sfera.az bildirir ki, bunu deputat Fazil Mustafa deyib.

O qeyd edib ki, test üsulu tətbiq ediləndən üç-dörd il sonra ali məktəblərə qəbulun ən sadə forması tapılmalı idi:

“Əsas diqqət isə qəbula deyil, məktəbi bitirməyə yönəlməlidir. İnkişaf etmiş ölkələrdə hazırlıqsız şəxs rahatlıqla daxil olduğu məktəbi asan tamamlaya bilmir. Məhz bu vaxt itkisinin qorxusundan insanlar orada ali təhsili əyləncəyə çevirmirlər. Cavabları variantların birində göstərilən test forması isə savadlı insan yetişdirə bilməz. Ona görə də ən yüksək balla daxil olmuş insanların əksəriyyəti normal esse yaza bilmir, mütailə vərdişinə sahib deyil və nəticədə tam yetkin mütəxəssis kimi yetişməkdə çətinlik çəkir”.

Millət vəkili bildirib ki, testin məhsulu sayılan tələbələrin əksəriyyətinə bədii ədəbiyyatın, gündəlik mütaliənin faydası hələ də təlqin edilə bilmir:

“Kütləvi bir tənbəlləşmə aurası görürəm və üzülürəm. Addımbaşı qurbağa xətləri, hərf səhvləri ilə dolu diplomlu insanların mətnləri ilə tanış olduqda problemin hansı həddə olduğunu duyuram. Çıxış yolu ali məktəblərin girişini açıb çıxışını daraltmaqdır. Etiraf edək ki, bütün bunların əsas mənbəyi orta təhsilin optimal faydalılığının olmamasında axtarılmalıdır. Azərbaycanda həm dövlətin, həm də cəmiyyətin təhsil hədəfləri anlaşılmazlıqlarla doludur”.

Türkan