Spikerdən İran Parlamentinə Xocalı ÇAĞIRIŞI: Qarşı tərəfin cavabı nə olacaq?
Gündəm
16:23 / 06.08.2021
1177
Bu gün Azərbaycan
Milli Məclisinin sədri Sahibə Qafarova İran İslam Şurası Məclisinin rəhbəri Məhəmmədbaqer Qalibaf ilə görüşüb.
Görüşdə diqqətçəkən
əsas məqam S.Qafarovanın İran parlamentini Xocalı soyqırımını tanımağa
çağırması olub.
Maraqlıdır,
qarşı tərəf çağırışa müsbət cavab verəcəkmi?
Bununla
bağlı Sfera.az-a danışan Milli Məclisin deputatı Cavid Osmanov deyib ki, Azərbaycan
hər zaman beynəlxalq münasibətlər sistemində istər bölgə ölkələri, istərsə də
digər dünya ölkələri ilə sıx əməkdaşlıq etmək niyyətində olub, qarşılıqlı əlaqələr
qurmağa çalışıb:
"Azərbaycanla
İran arasında dost münasibətləri var. Biz bunun dəfələrlə ölkə başçısı İlham
Əliyev tərəfindən qeyd edildiyini görmüşük. O cümlədən bölgə ölkəsi olduğu üçün
İranla iqtisadi, ticari əlaqələrimiz var. Bu baxımdan Milli Məclis sədrinin rəhbərliyi
ilə nümayəndə heyətinin İrana səfər etməsi, burada keçirilən görüşlər, xüsusən
də Xocalı soyqırımının tanınması ilə bağlı çağırış, əlbəttə, müsbət haldır. Ümid edirik
ki, İran tərəfindən məhz Xocalı soyqırımının tanınması həyata keçiriləcək”.
"Digər tərəfdən İran islam respublikasıdır və Ermənistan sözügedən soyqırımı, vandallığı əsasən İslam mənsubiyyətli insanlara – xalqımıza qarşı edib. Azərbaycan tolerant ölkə kimi dünyaya nümunədir. Ermənistanın 30 il müddətində torpaqlarımızı işğala məruz qoyduğu zaman burada dini abidələrin tamamilə dağıdılmasını, məscidlərə qarşı təhqirlərin edilməsini, orada heyvan saxlamaqlarını, düşünürəm ki, digər ölkələr kimi İran da yaxından izləyib. Məhz buna görə də, İran İslam Respublikasının parlament səviyyəsində Xocalı soyqırımının tanıdılması istiqamətində addımlar atacağına ümidlə yanaşmalıyıq”.
Günay Rəsulqızı