Orduxan və “dostları” Bakıya gətirilə bilər – Onları da Lapşinin aqibəti gözləyir
Əlbəttə, Azərbaycan vətəndaşları Orduxan kimi ləyaqətsiz adamların çağırışlarında heç bir əsas görmür və onun fikirlərinə açıq etirazlarını bildirirlər. Lakin qanun da öz sözünü deməlidir. Heç bir halda imkan vermək olmaz ki, bu qədər cinayət tərkibli davranışlara yol verən xain xislətli adamlar məsuliyyətdən yayınsınlar. Düzdür, onlar Avropa ölklərində yaşadıqlarından hələlik onların Azərbaycanda məhkəmə qarşısında dayanmasını təmin etmək çətindir. Lakin mümkünsüz də deyil.
Sfera.az Missiya.Az-a istinadən bildirir ki, millət vəkili Fazil Mustafa həmin şəxslərin Azərbaycana gətirilməli olduqlarını hesab edir.
Onun fikrincə, onların cəzalandırılması üçün mühacirlərin sığındığı ölkələrin hüquq-mühafizə orqanları ilə qarşılıqlı razılıq əldə olunmalıdır:
"Azərbaycan hakimiyyətinə qarşı təhqiredici fikirlər səsləndirən mühacirələrin Azərbaycana gətirilməsini həmin şəxslərin olduğu ölkələrin hüquq mühafizə orqanları ilə müzakirə etmək olar. Həmin dövlətlərlə qarşılıqlı razılaşma varsa, Azərbaycanda cinayət işi qaldırılıb, həmin ölkələrə göndərilə bilər. Bunun üçün həmin ölkələrin hüquq-mühafizə orqanlarına konkret əsaslandırılmış təhqir motivli çıxışlar göndərilməlidir. Sonra Azərbaycan tərəfi təhqirə yol verən şəxslərin ölkə gətirilməsini və istintaqa ifadə verməsini tələb edə bilər. Amma sosial şəbəkələrdə bu insanlara qarşı hər hansı tədbirlərin görülməsi üçün hüquqi mexanizm yoxdur. Söhbət əlbəttə ki, təhqirdən gedir. Tənqid hər kəsin hüququdur. Tənqidə görə hər hansı hüquqi məhsuliyyət tələb olunmur”.
Fazil Mustafa bildirib ki, onların birdən-birə fəallaşmasının səbəbləri müxtəlifdir:
"Mən dəqiq səbəbləri bilmirəm. Amma ola bilər ki, erməni lobbisinin təsiri ilə belə çıxışlar edirlər. Həmçinin yaşadıqları ölkələrin xüsusi xidmət orqanlarının maraqlarını da təmsil edə bilərlər”.
Kimliyindən asılı olmayaraq, hər kəs qanun qarşısında bərabərdir. Daxildə və xaricdə Azərbaycanın milli maraqlarına qarşı çıxan hər bir şəxs gec-tez cəzasını alır. Buna biz yaxın tarixdə şahidlik etmişik. Yada salaq ki, Azərbaycan Respublikasının Ermənistan silahlı qüvvələri tərəfindən işğal edilmiş ərazilərində yaşayan digər şəxslərlə qabaqcadan əlbir olub cinayət əlaqəsinə girərək bu ərazilərə qanunsuz səfərlər edən, burada qeyri-qanuni fəaliyyət göstərən rejimin "müstəqilliyi"ni dəstəkləməklə Azərbaycanın beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edən, ayrı-ayrı dövlətlərin vətəndaşlığını daşıyan bloqqer Aleksandr Lapşin fevralın 7-də Belarus Respublikasından Azərbaycan Respublikasına ekstradisiya edilib. A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan Baş Prokurorluğun ağır cinayətlərə dair işlər üzrə İstintaq İdarəsində fakta görə Azərbaycan Respublikası Cinayət Məcəlləsinin 281.2-ci (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və barəsində dövlətlərarası axtarış elan edilib.
Lapşin Azərbaycan tərəfinin tələbi ilə dekabrın 14-də Belarus Respublikası hüquq mühafizə orqanlarının həyata keçirdikləri tədbirlər nəticəsində saxlanılıb. İyulun 20-də isə o, cəzasını ümumi rejimli cəzaçəkmə müəssisəsində çəkməklə 3 il müddətinə azadlıqdan məhrum edilib.
Beləliklə, Azərbaycan prezidentinin nüfuzu və səyi nəticəsində ölkəmiz əleyhinə kompaniyalarda iştirak edən Lapşin qısa müddət ərazində öz cəzasını aldı. Deməli, Orduxan və onun başının dəstəsinin də ölkəyə gətirilməsinə ancaq vaxt məsələsi kimi baxmaq lazımdır.
Dövlət hər bir vətəndaşı üçün açıq müzakirə mühiti yaradıb. Bu şansdan sui-istifadə etmək olmaz. Təhqir bütün dünyada cinayət məsuliyyəti yaradır.
