Bakı Forumu iqtisadi cəlbediciliyin göstəricisidir
Prezident İlham Əliyevin himayəsi altında Bakıda keçirilən ll Azərbaycan Beynəlxalq İnvestisiya Forumu sosial-iqtisadi sahə ilə bağlı dövlət siyasətinin əsas prioritetlərinin həyata keçirilməsinə xidmət edir. Bu cür mötəbər tədbirin ölkə iqtisadiyyatı üçün əhəmiyyəti “Azərbaycan Beynəlxalq İnvestisiya Forumunun Təşkilat Komitəsinin yaradılması haqqında” 2026-cı il 7 avqust tarixli Prezident Sərəncamında açıq mətnlə təsbit olunur:
“Azərbaycan Respublikasının iqtisadi və investisiya potensialının beynəlxalq səviyyədə təşviqi, əlverişli biznes və investisiya mühitinin daha da təkmilləşdirilməsi, xarici investisiyaların cəlb edilməsi, qeyri-neft sektorunun dayanıqlı inkişafının təmin olunması və ölkənin qlobal iqtisadi sistemə inteqrasiyasının gücləndirilməsi dövlətin sosial-iqtisadi siyasətinin əsas prioritet istiqamətlərindəndir”.
Forumdan bir gün əvvəl cənab Prezidentin qəbul etdiyi şirkət rəhbərlərinin çoxşaxəli fəaliyyət sahəsi aydın şəkildə göstərir ki, ölkəmizlə iqtisadi əməkdaşlığa beynəlxalq maraq ildən-ilə artmaqdadır. Görüşdə “Neuberger Berman”, “Brookfield Asset Management” və “Global Infrastructure Partners” kimi dünyanın aparıcı investisiya şirkət təmsilçilərinin iştirakı Azərbaycana göstərilən beynəlxalq marağın miqyasından xəbər verir. Təkcə onu qeyd etmək kifayətdir ki, həmin investisiya şirkətləri toplam olaraq trilyonlarla ABŞ dolları həcmində aktivləri idarə edir və özəl bazarlar üzrə 100 milyardlarla ABŞ dolları ilə ölçülən qlobal investisiya platformasına sahibdirlər. Cənab Prezidentin Çinin “01.Al” və “Sinovation Ventures”, İtaliyanın “TEHA Group” şirkətlərinin rəhbər heyəti ilə görüşündə “Azərbaycan Respublikasının 2025-2028-ci illər üçün süni intellekt Strategiyası” sənədini xüsusi olaraq xatırlatması deməyə əsas verir ki, qarşılıqlı maraq dairəsi kifayət qədər geniş və çoxşaxəlidir.
Bu mötəbər tədbirin “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzuya həsr olunması həm də onu nümayiş etdirir ki, qlobal təhlükəsizlik arxitekturasında və dünya iqtisadiyyatında yaşanan təhlükəli çağırışlara baxmayaraq, Bakı Forumu mürəkkəb geosiyasi şəraitdən yeganə çıxış yolunu qarşılıqlı faydalı iqtisadi əməkdaşlığın təşviqində görür və Cənubi Qafqazı məhz belə əməkdaşlığın strateji mərkəzlərindən birinə çevirmək məqsədini hədəfləyir. Prezident İlham Əliyevin sentyabrın 24-də Forum iştirakçılarına ünvanladığı təbrik məktubunda bu məqam xüsusi olaraq vurğulanır:
“Cənubi Qafqazda bərqərar olmaqda olan sülh regional əməkdaşlıq, əlaqəlilik, ticarət və investisiyalar üçün yeni imkanlar yaradır, eyni zamanda daha dərin iqtisadi inteqrasiyaya və diversifikasiyaya dəstək verir... Orta Dəhliz Mərkəzi Asiyanı Xəzər dənizi vasitəsilə Cənubi Qafqaz, Türkiyə və Avropa ilə birləşdirir; formalaşmaqda olan Zəngəzur dəhlizi- TRIPP əlaqəlilik marşrutu kimi də tanınır-isə Azərbaycanın regional mərkəz rolunu daha da gücləndirəcək və bütün Avrasiya məkanında ticarət, investisiya və sənaye əməkdaşlığı üçün yeni imkanlar yaradacaqdır”.
Təbrik məktubunda yer alan fikirlər Azərbaycan Prezidentinin Cənubi Qafqazla yanaşı, Avrasiya coğrafiyası ilə bağlı strateji vizyonunu əks etdirir. Prezident İlham Əliyevin beynəlxalq auditoriyaya verdiyi əsas mesaj ondan ibarətdir ki, mövcud geosiyasi qarşıdurmadan mümkün qədər az itki ilə çıxmağın yeganə yolu yeni iqtisadi zəncirlərin qurulmasından və onların möhkəmlənməsindən keçir. Cənab Prezidentin təbrik məktubunda etdiyi çağırış elə həmin məqsədə xidmət edir:
“Əminəm ki, Bakıdakı müzakirələr konkret təşəbbüslərə və uzunmüddətli əməkdaşlığa təkan verəcək, regionda iqtisadi əlaqələrin möhkəmlənməsinə, əlaqəliliyin artmasına və ümumi rifaha töhfə verəcəkdir”.
Danılmaz həqiqətlərdən biri də onunla bağlıdır ki, Azərbaycanın əldə etdiyi Zəfər və nəticədə Cənubi Qafqazda yaratdığı yeni reallıq ümumi rifahın əldə olunması üçün tarixi fürsət yaradır. Ən başlıcası, ölkəmizin siyasi müstəqilliyi, iqtisadi dayanıqlığı, təhlükəsiz və cəlbedici investisiya mühiti bu hədəfin gerçəkləşməsinə xidmət edir. “Fitch” və “Moody’s” kimi nüfuzlu beynəlxalq reytinq agentlikləri tərəfindən Azərbaycanın suveren kredit reytinqinin investisiya səviyyəsinə yüksəldilməsi, qarşıdakı dövr üçün “sabit” və “müsbət” qiymətləndirilməsi iqtisadi cəlbediciliyin əyani göstəricisidir.
2020-ci ildən başlayaraq qeyri-neft sektorunda real ÜDM artımının orta hesabla 5 faiz səviyyəsində qərarlaşması, ötən il isə bu sektorun ÜDM-də payının 72 faizə çatması həm də onun göstəricisidir ki, ölkəmizdə suveren dəyər zəncirinin yaradılması istiqamətində atılan ardıcıl addımlar öz bəhrəsini verməkdədir. Prezident İlham Əliyevin Forum iştirakçılarına təbrik məktubunda qeyd etdiyi kimi, “Azərbaycanın strateji coğrafi mövqeyi, nəqliyyat-logistika imkanları, iqtisadi zonalarda yaradılmış müasir infrastruktur, vergi və gömrük güzəştləri, habelə dövlət-özəl tərəfdaşlığı mexanizmləri və tərəfdaş ölkələrlə təsis edilmiş birgə investisiya fondları investorlara dayanıqlı layihələrdə iştirak etmək və bütün regiona texnologiya, kapital və təcrübə gətirən tərəfdaşlıqlar qurmaq üçün geniş imkanlar açır”.
Forum çərçivəsində ölkəmizin müvafiq qurumları ilə “XRG”, “TotalEnergies”, “Comstock”, “Apollo”, “SEFE”, “Eni S.p.A.”, “ExxonMobil”, “Oracle”, “VNG AG” , “UFlex Group”, “Carlsberg Group” və “Hong Kong Renteng International Trade Co. Limited” kimi dünyanın aparıcı şirkətləri arasında imzalanmış investisiya sazişləri, birgə kəşfiyyata və hasilata dair müqavilələr ona dəlalət edir ki, Azərbaycanın iqtisadi cəlbediciliyi qlobal biznes-strukturların diqqət mərkəzindədir. Prezident İlham Əliyevin iştirakı ilə bu gün Bakı Konqres Mərkəzində “Minkənd” Kiçik Su Elektrik Stansiyasının onlayn formatda keçirilən açılış törəni, həmçinin Mingəçevir Sənaye Parkında “Textile Horizon” MMC-nin “Tekstil Klasteri” layihəsi üzrə iri istehsal müəssisəsinin təməlqoyma mərasimi ölkəmizdəki investisiya mühitinə yüksək etimadın əməli təzahürüdür.
Sözsüz ki, istənilən investor, xüsusilə böyük sərmayədar üçün ən vacib məsələlərdən biri kapital yatırdığı ölkənin siyasi və iqtisadi sabitliyi ilə bağlıdır. Prezident İlham Əliyev sentyabrın 26-da Form iştirakçıları qarşısındakı çıxışı zamanı bu məqamı xüsusi vurğulayaraq qeyd etdi ki, Azərbaycanda siyasi və iqtisadi sabitlik 30 ildən çox hökm sürür. Bakı Forumunda dünyanın nüfuzlu şirkətlərinin iştirakı və ölkəmizlə iqtisadi əməkdaşlığa göstərilən aşkar maraq, ilk növbədə, Ulu Öndər Heydər Əliyev tərəfindən əsası qoyulan və Prezident, Müzəffər Ali Baş Komandan İlham Əliyevin qətiyyətli siyasi vizyonu sayəsində ərsəyə gətirilən müstəqil və qüdrətli Azərbaycan reallığı ilə bağlıdır.
Bu gün bu reallığı hər kəs görür və onu etiraf etməkdən artıq çəkinmir. Əminəm ki, “Global Infrastructure Partners”in təsisçisi Adebayo Oqunlesinin Forumda səsləndirdiyi bu fikir böyük əksəriyyətin mövqeyini əks etdirir:
“Ona görə də Azərbaycan xalqı İlham Əliyevi 5 dəfə Prezident seçib. Əgər azərbaycanlı olsaydım, mən də İlham Əliyevə səs verərdim”.
Ülvi Quliyev,
Milli Məclisin deputatı
