Zelenskinin Trampa göstərdiyi bu şəkil onu təsirləndirdi - FOTO

Fransada keçirilən G7 liderlərinin sammitində həlledici an Ukrayna Prezidenti Volodimir Zelenskinin Donald Trampa Kiyevdə yerləşən Dormition kilsəsinin yanmış görüntülərini göstərməsi olub.

Sfera.az xarici mediaya istinadən xəbər verir ki, Rusiyanın hava zərbələri nəticəsində zədələnən XI əsrə aid tarixi məbədin fotoları ABŞ prezidentinə ciddi təsir göstərib. G7 rəsmilərinin sözlərinə görə, məhz bu görüntülər Trampın Ukraynaya daha güclü dəstək verməsi ilə nəticələnən yekun qərara təsir edən əsas amillərdən biri olub.

Məlumata görə, Zelenski fotoları təqdim etsə də, sammitin ev sahibi olan Fransa Prezidenti Emmanuel Makron Trampın mövqeyini dəyişmək üçün əvvəlcədən xüsusi diplomatik strategiya hazırlayıb. Sammitdən əvvəl bir çox müşahidəçi görüşün uğursuz keçəcəyini və Trampın tədbiri vaxtından əvvəl tərk etməməsinin belə uğur sayılacağını düşünürdü.

Lakin Makron gözlənilməz diplomatik uğura imza ataraq ABŞ prezidentini Ukraynaya əlavə hərbi dəstək göstərilməsinə razı sala bilib. Mənbələrin bildirdiyinə görə, bazar ertəsi axşamı keçirilən şam yeməyində Makron və digər G7 liderləri Trampa Ukraynanın döyüş meydanında üstünlük qazandığını, Rusiyanın isə həm cəbhədə geri çəkildiyini, həm də mülki obyektlərə və dini abidələrə hücum etdiyini izah ediblər. Diplomatlardan biri bildirib ki, əsas mesaj Rusiyanın zəiflədiyi və çıxılmaz vəziyyətdə qalaraq daha aqressiv addımlar atdığı barədə olub.

Sammit zamanı Makronun diplomatik bacarığı digər liderlər tərəfindən də yüksək qiymətləndirilib.

İtaliyanın Baş naziri Corcia Meloni belə Fransa liderinin mürəkkəb beynəlxalq şəraitdə “əla iş gördüyünü” etiraf edib.Makron Trampı razı salmaq üçün bir sıra jestlər də edib. Belə ki, sammitin tarixi ABŞ prezidentinin ad gününə uyğunlaşdırılıb, qonaq siyahısı yenidən nəzərdən keçirilib və Tramp üçün Versal Sarayında xüsusi ziyafət təşkil olunub.

Nəticədə G7 ölkələri, o cümlədən ABŞ, Rusiyaya qarşı yeni sanksiyaları dəstəkləyib və Ukraynaya “sarsılmaz dəstək” vəd edən birgə bəyanat qəbul ediblər. Bununla yanaşı, liderlər Çin nadir torpaq metalları asılılığını 2030-cu ilə qədər azaltmaq barədə də razılığa gəliblər ki, bu da Fransa diplomatiyasının növbəti uğuru kimi qiymətləndirilir.

Buna baxmayaraq, diplomatlar Trampın dəyişkən mövqeyini nəzərə alaraq əldə olunan nəticələrin uzunmüddətli olacağına tam əmin deyillər. Sammitin sonunda isə Tramp Makron haqqında müsbət fikirlər səsləndirib.

“Prezident Makron əla iş gördü. Həqiqətən fantastik iş ortaya qoydu”, – deyə ABŞ prezidenti bildirib.

Lakin Tramp Fransanı tərk edərkən zarafatla bir məsələni müzakirə etməyi unutduğunu da etiraf edib:

“Qrenlandiyanı müzakirə etmədik. Əslində Qrenlandiyanı müzakirə etməli idim”.

Əzizə Zeynal

Sfera.az