Kənd təsərrüfatı müasir dünyamızda artıq yalnız iqtisadi fəaliyyət sahəsi deyil, dövlətlərin strateji təhlükəsizlik məsələsinə çevrilib. Qlobal miqyasda müharibələr, iqlim dəyişiklikləri, enerji böhranı və təchizat zəncirlərində yaşanan problemlər ərzaq təhlükəsizliyinin əhəmiyyətini daha da artırıb.

Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər də göstərir ki, Azərbaycanda aqrar sektor məhz bu prizmadan qiymətləndirilir. Cənab prezident çıxışında vurğuladı ki, kənd təsərrüfatının inkişafı uzun illərdir dövlət siyasətinin əsas istiqamətlərindən biridir. Hələ 2004-cü ildən başlanan regional inkişaf proqramları nəticəsində bölgələrdə genişmiqyaslı infrastruktur layihələri həyata keçirildi, qazlaşdırma, elektrik təchizatı, yol və su infrastrukturu yeniləndi. Bu dəyişikliklər yalnız regionların simasını dəyişmədi, eyni zamanda kənd təsərrüfatının inkişafı üçün möhkəm baza yaratdı.

Bildiyimiz kimi, son illərdə aqrar sahədə mühüm nəticələr əldə olunub. Pambıqçılıq, baramaçılıq, fındıqçılıq, üzümçülük və digər ənənəvi sahələrə verilən dövlət dəstəyi istehsalın artmasına səbəb olub. Vaxtilə tənəzzül yaşayan pambıqçılıqda məhsuldarlığın yüksəlməsi, baramaçılığın yenidən canlanması aparılan siyasətin praktik nəticəsi kimi qiymətləndirilə bilər. Subsidiyalar, güzəştli kreditlər, aqroparkların yaradılması, texnika və gübrə təminatı bu inkişafın mühüm komponentləri sırasındadır. Bununla yanaşı, Prezident İlham Əliyev kənd təsərrüfatında mövcud problemləri də açıq şəkildə diqqətə çatdırdı. Xüsusilə bəzi məhsullar üzrə özünütəminetmə göstəricilərinin qənaətbəxş olmaması yeni yanaşmaların vacibliyini ortaya qoyur. Buğda istehsalında ölkənin hələ də idxaldan asılı olması, bitki yağları, ət və süd məhsulları üzrə mövcud göstəricilər aqrar sahədə əlavə potensialın olduğunu göstərir. Məhz bu reallıqlar fonunda 2026–2030-cu illəri əhatə edən yeni Dövlət Proqramı xüsusi əhəmiyyət daşıyır. Dövlət başçısının çıxışında diqqət çəkən əsas məqamlardan biri kənd təsərrüfatında müasir texnologiyaların tətbiqinə verilən önəm idi. Torpaq analizlərinin aparılması, elektron xəritələşdirmə, peyk imkanları və süni intellekt texnologiyalarından istifadə artıq gələcəyin deyil, bugünkü aqrar idarəetmənin tələbi kimi təqdim olunur.

Prezident İlham Əliyevin müşavirədə səsləndirdiyi ən diqqətçəkən fikirlərdən biri isə, kənddən şəhərə miqrasiyanın qarşısının alınması ilə bağlı oldu. Dövlət başçısının ifadə etdiyi kimi, məqsəd kəndlərdən şəhərlərə axını sürətləndirmək deyil, əksinə, şəhərlərdən kəndlərə qayıdış üçün şərait yaratmaqdır. Bu yanaşma aqrar siyasətin yalnız iqtisadi deyil, həm də sosial mahiyyət daşıdığını göstərir. Kənd yerlərində məşğulluğun artırılması, xidmət sektorunun inkişafı, təhsil və səhiyyə infrastrukturunun gücləndirilməsi bu strategiyanın mühüm hissəsidir. Su təminatı, müasir suvarma sistemləri, soyuducu anbarların genişləndirilməsi, intensiv bağçılıq və istixana komplekslərinin artırılması da qarşıdakı dövrün prioritet istiqamətləri sırasında yer alır. Bütün bunlar onu göstərir ki, Azərbaycanda kənd təsərrüfatı siyasəti yeni inkişaf mərhələsinə qədəm qoyur. Prezident İlham Əliyevin müşavirədə ortaya qoyduğu yanaşma bir daha təsdiqləyir, onu deməyə əsas verir ki, kənd təsərrüfatının inkişafı yalnız ərzaq təminatı məsələsi deyil. Bu, regionların inkişafı, investisiya imkanlarının genişlənməsi, kənd həyatının canlandırılması və milli iqtisadi dayanıqlığın möhkəmləndirilməsi baxımından strateji əhəmiyyət daşıyan istiqamətdir.

Cavanşir Feyziyev, Milli Məclisin deputatı

Cavanşir Feyziyev

Kənd təsərrüfatında yeni mərhələnin konturları