Rusiya və Ukrayna arasında prezidentlər səviyyəsində görüş baş tuta bilər, lakin Rusiya Prezidentinin mətbuat katibi Dmitri Peskov bildirib ki, hələlik belə bir görüş üçün bütün zəruri hazırlıqlar tamamlanmayıb.

Bəs, sülh prosesində irəliləyişin olması üçün hansı əsas addımlar atılmalıdır?

Mövzu ilə bağlı Sfera.az-a açıqlama verən politoloq Züriyə Qarayeva bildirib ki, belə bir görüşün reallaşması üçün hər iki tərəfin siyasi iradəsinin konkret addımlarla dəstəklənməsi və dialoqa hazır olduqlarını nümayiş etdirməsi vacibdir:

“Görüşün keçirilməsi üçün ilk növbədə qarşılıqlı etimadı gücləndirəcək addımlar atılmalıdır. Əsir dəyişdirilməsi, mülki əhalinin müdafiəsi və beynəlxalq humanitar təşkilatların maneəsiz fəaliyyəti kimi humanitar məsələlərdə razılaşmalar əldə olunmalıdır. Həmçinin, hərbi eskalasiyanın azaldılması və lokal atəşkəslərin təmin olunması, beynəlxalq vasitəçilərin fəal iştirakı əsas şərtlər sırasındadır”.

Sülh prosesində irəliləyişin təmin olunması üçün dialoqun mərhələli şəkildə aparılmasının vacibliyini vurğulayan politoloq bildirib ki, ilkin mərhələdə həmçinin, ərazi mübahisələri beynəlxalq hüquq prinsipləri çərçivəsində müzakirə olunmalıdır:

“ABŞ, Avropa İttifaqı, Çin və Türkiyə kimi beynəlxalq güclərin dəstəyi və neytral mexanizmlərin yaradılması əldə ediləcək razılaşmaların davamlılığını təmin edə bilər”.

Ekspertin fikrincə, prezidentlər səviyyəsində görüşün effektiv və nəticəverici olması üçün öncə diplomatik və humanitar sahələrdə real irəliləyişlər baş verməlidir.

Bəsti Rəfizadə
Sfera.az

Putin və Zelenski hansı halda bir araya gələcək? - AÇIQLAMA