Peskov: "Rusiya və Ukrayna prezidentləri görüşə bilər"

Rusiya ilə Ukrayna arasında prezidentlər səviyyəsində görüş yalnız uzunmüddətli hazırlıq və ekspertlər səviyyəsində dialoqdan sonra baş tuta bilər. 

Sfera.az “Qazeta.ru” nəşrinə istinadən xəbər verir ki, bu barədə Kremlin mətbuat katibi Dmitri Peskov brifinqdə məlumat verib.

Peskov bildirib ki, hələlik belə görüş üçün bütün hazırlıq işləri tamamlanmayıb. Onun sözlərinə görə, prezident Vladimir Putin yalnız zəruri texniki işlər görüldükdən və lazımi məsafə qət edildikdən sonra görüşün keçirilməsini istisna etmir.

Ukrayna lideri Vloldimir Zelenski isə avqustun 2-də Putinin bəyanatlarını şərh edərək bildirib ki, əgər Rusiya münaqişəni dayandırmağa hazırdırsa, Kiyev texniki görüşlərdən birbaşa prezidentlər səviyyəsində dialoqa keçməyə hazırdır.

Xatırladaq ki, Putin bir müddət əvvəl Valaam adasında çıxışı zamanı Ukrayna ilə danışıqlar üçün hələ vaxt yetişmədiyini vurğulamış və Rusiyanın heç bir vaxt məhdudiyyəti olmadan uzunmüddətli sülh istiqamətində addımlar müzakirə etməyə hazır olduğunu demişdi.

Bundan öncə isə Rusiya siyasətçisi Viktor Medvedçuk Zelenski üçün tribunalın hazırlandığını açıqlamışdı.

Fidan Hacızadə
Sfera.az