Zəngəzur dəhlizi reallaşır - İran və Ermənistan münasibətləri necə olacaq?
İran Zəngəzur dəhlizinin açılmasına qarşı çıxmağa davam edir. Ermənistan Baş naziri Nikol Paşinyandan sonra prezident Vaaqn Xaçaturyan da dəhlizin vacibliyini vurğulayıb ki, bu da bölgədə mühüm dəyişikliklərin baş verəcəyindən xəbər verir.
İran hakimiyyəti hər zaman Zəngəzur dəhlizinin onlar üçün qırmızı xətt olduğunu bəyan ediblər. Rəsmi Tehranın bütün təzyiqlərinə baxmayaraq belə görünür ki, Ermənistan dəhlizin açılmasına razı olacaq.
Bəs dəhlizin açılması, burada Qərb şirkətlərinin iştirakı Ermənistanla İranın münasibətlərini soyuda bilərmi?
Sfera.az-a açıqlama verən politoloq Zaur Məmmədov qeyd edib ki, Zəngəzur dəhlizinin açılması artıq şübhə doğurmur. Hazırda Ermənistan dəhlizin hansı marşrutla keçəcəyi və təhlükəsizlik məsələləri üzərində düşünür.
Politoloq bildirib ki, qonşu ölkələr, xüsusilə İran Zəngəzur dəhlizindən ciddi narahatlıq keçirir:
"İranın rəsmi və qeyri-rəsmi dairələri tez-tez bu mövzu ilə bağlı bəyanatlar verirlər. Hərçənd Prezident Pəzəşkian daha yumşaq mövqe nümayiş etdirir, lakin İranın hərbi korpusu və internet resurslarında radikal və ittiham xarakterli açıqlamalar səsləndirilir".
Zaur Məmmədovun fikrincə, bu məsələ Azərbaycanın deyil, Ermənistanın səlahiyyətindədir. O qeyd etdi ki, ABŞ şirkətinin bu layihədə iştirak edib-etməməsinə Ermənistan rəhbərliyi qərar verəcək:
"Azərbaycanın bu prosesə birbaşa aidiyyəti yoxdur və ölkə ərazisində xarici dövlət və ya şirkətin nəqliyyat yollarının idarə edilməsinə icazə verilməyəcək – bu, dəyişməz qərardır".
Politoloq əlavə edib ki, Ermənistan hökuməti hal-hazırda ABŞ şirkətinin iştirak etməyəcəyini bəyan etsə də, daha əvvəl tam əks bəyanatlar səsləndirmişdi. Ekspertin sözlərinə görə, bu isə onu göstərir ki, 2026-cı ilin iyununda keçiriləcək parlament seçkilərinə qədər Paşinyan Zəngəzurla bağlı radikal addımlar atmamağa üstünlük verəcək:
"Lakin seçkilərdən sonra ABŞ və Rusiya arasında strateji seçim etməsi gözlənilir".
Zaur Məmmədov bildirir ki, Azərbaycan üçün əsas prioritet regional dövlətlərlə əməkdaşlıqdır:
"Bakı həm İran, həm də Rusiya ilə şərq-qərb və şimal dəhlizləri çərçivəsində qarşılıqlı ticarət əlaqələrini inkişaf etdirməyə hazırdır".
Firuzə Əliyeva
Sfera.az
