Kreml sammit üçün şərtini açıqladı: "Bunsuz görüş ola bilməz"

“Moskva və Kiyev arasında Rusiya-Ukrayna sammitinin keçirilməsi üçün əvvəlcə sülh prosesini əhatə edən memorandumların əlaqələndirilməsi vacibdir”.

Sfera.az “TASS” agentliyinə istinadən xəbər verir ki, bunu Kremlin sözçüsü Dmitri Peskov bu gün keçirdiyi brifinqdə bildirib. 

“Bu memorandumları yekunlaşdırmaq üçün lazım olan bütün işlər görüşə hazırlığın bir hissəsidir”, – deyə Peskov qeyd edib. Onun sözlərinə görə, bu mərhələ başa çatmadan sammit üçün konkret tarixlərin müəyyənləşdirilməsi məqsədəuyğun deyil: “Bu çətin təməl işlərini tamamlamadan sammit üçün konkret tarixlər təyin etməyin mənası yoxdur”.

Peskov əlavə edib ki, əgər bu proses əvvəlcədən razılaşdırılmasa, o zaman bu kobud, çox mürəkkəb və geniş iş birbaşa ən yüksək səviyyədə aparılmalı olacaq.

Digər tərəfdən, Ukrayna Prezidenti Volodimir Zelenski bu axşam İstanbulda nəzərdə tutulan Rusiya-Ukrayna danışıqlarının üçüncü raundu ərəfəsində çıxışı zamanı dəfələrlə vurğulayıb ki, əsas prioritet sammitin təşkili olmalıdır.

Lakin Kreml israr edir ki, tərəflər əvvəlcə İstanbulda keçirilmiş ikinci raund zamanı təqdim olunan sülh sənədi layihələri üzərində razılığa gəlməlidirlər. Bu sənədlər danışıqların əsasını təşkil edir və sammitə aparan yol xəritəsi kimi qiymətləndirilir.

Fidan Hacızadə
Sfera.az