Son zamanlar Rusiya ilə Azərbaycan arasında münasibətlərdə nəzərəçarpacaq dərəcədə soyuqluq müşahidə olunur. Azərbaycan tərəfinin verdiyi açıq mesajlara baxmayaraq, Moskva münasibətləri əvvəlki müstəviyə qaytarmaq üçün ciddi addımlar atmır. Bu vəziyyət Rusiyanın məqsədyönlü siyasət yürütməsi ehtimalını gücləndirir.

Bununla bağlı Sfera.az-a açıqlama verən Milli Məclisin deputatı Hikmət Babaoğlu bildirib ki, Rusiya Azərbaycanla münasibətlərdə haqsız və hüquqsuz davranır:
“Rusiya bilir ki, iki ölkə arasında yaranan gərginliyin əsas səbəbkarı özüdür.

Azərbaycan təyyarəsini vuran Rusiyadır, Azərbaycan vətəndaşlarına qarşı haqsız cəza tədbirləri həyata keçirən, onların milli hisslərini təhqir edən hərəkətlərin müəllifi də Rusiyadır. Rəsmi Moskva bu həqiqətləri özü də anlayır və bu səbəbdən daha da aqressivləşir”.

Deputatın sözlərinə görə, Rusiyanın aqressiyası əslində haqsızlığını etiraf etməsinin göstəricisidir.

“O, zorakılıq yolu ilə hansısa nəticə əldə etməyə və bu yolla öz davranışlarını əsaslandırmağa çalışır. Amma bu mümkün deyil. Ola bilsin ki, 30 il əvvəl, yaxud 5 il öncə Rusiya bu yanaşma ilə nəyəsə nail ola bilərdi. O dövrdə Rusiyanın əlində “Qarabağ kartı” var idi. Amma bu gün artıq həmin kart yoxdur və Rusiya Azərbaycana heç nəyi qəbul etdirə bilməz”, – deyə deputat bildirib.

Hikmət Babaoğlu hesab edir ki, Azərbaycan prezidenti bu vəziyyəti “qeyri-məhsuldar və qeyri-səmərəli mövqe” adlandırmaqla haqlı və yerində bir mövqe ortaya qoyub. O əlavə edib ki, Rusiyada hələ də Azərbaycanla real münasibətlərin önəmini dərk edən, iki ölkənin bir-birinə olan ehtiyacını anlayan siyasətçilər var və onlar vəziyyətin tamamilə çıxılmaz hala gəlməsinə imkan verməmək üçün müəyyən rol oynayırlar:

“Sərhədlərimizdə və siyasi münasibətlərdə gərginlik hələ kulminasiya nöqtəsinə çatmayıb. Geri dönüş imkanları hələ var. Əks təqdirdə, itirən tərəf Rusiya olacaq”.

Bəsti Rəfizadə
Sfera.az

“Rusiyanın aqressivləşməsi bununla bağlıdır” - Hikmət Babaoğlu