Paşinyandan gecikən etiraf: “Qarabağı Azərbaycanın tərkib hissəsi kimi daha əvvəl təsdiqləməliydik”
“Qarabağın Azərbaycanın tərkib hissəsi kimi tanınması ilə bağlı qərarı daha tez verməli idik”.
Sfera.az xəbər verir ki, bunu Ermənistanın baş naziri Nikol Paşinyan bu gün keçirdiyi mətbuat konfransında deyib.
“Bəli, mən 2022-ci ildə Azərbaycanın ərazi bütövlüyünü və Qarabağın onun tərkibində olduğunu tanıdım. Amma bu qərar çox daha əvvəl verilməli idi. Təəssüf ki, bu məsələ ilə bağlı gecikdik və bu, həm Ermənistan, həm də bölgə üçün ciddi nəticələr doğurdu.”
Paşinyanın bu etirafı, onun sülh prosesində son dönəmlərdə atdığı addımların məntiqi davamı kimi qiymətləndirilir.
O, bir tərəfdən Qarabağın Azərbaycanın ayrılmaz hissəsi olduğunu rəsmən qəbul etdiyini xatırladır, digər tərəfdən isə bu mövqeyin vaxtında qəbul edilməməsinin yaratdığı siyasi və humanitar fəsadlara işarə edir. Bu açıqlama Ermənistan cəmiyyətində və siyasi dairələrdə ciddi rezonans doğura bilər.
