Donald Tramp ABŞ-nin Rusiyaya qarşı sanksiyaları kəskinləşdirəcəyini elan edib, xüsusilə Rusiyanın ticarət tərəfdaşlarına “ikinci dərəcəli” sanksiyaların tətbiq ediləcəyini bildirib.

Azərbaycan da Rusiyanın ticarət tərəfdaşı kimi sanksiyaların hədəfinə çevrilə bilərmi? Yəni, bu sanksiyaların Azərbaycana da tətbiq edilmə ehtimalı var?

Mövcud suallarla bağlı Sfera.az-a açıqlama verən politoloq Oqtay Qasımov bildirib ki, son vaxtlar ABŞ ilə Rusiya arasında münasibətlərdə müəyyən gərginlik müşahidə olunsa da, dünən Donald Trampın açıqlamalarından belə məlum oldu ki, Vaşinqton hələlik Rusiyaya qarşı çox sərt sanksiyalar tətbiq etmək niyyətində deyil:

“Əslində, Rusiyaya 50 günlük vaxt tanınması Putinə Ukrayna cəbhəsində müəyyən məqsədlərinə çatmaq üçün fürsət yarada bilər. Sanksiyalar məsələsinə gəlincə, ABŞ ictimaiyyətində bu mövzuda ümumi razılıq olsa da, Donald Tramp hələlik tələsmir”.

Politoloq prosesin Rusiyanın atacağı addımlardan və ABŞ-nin hədəflərinin reallaşıb-reallaşmamasından asılı olacağını əlavə edib.

O qeyd edib ki, əgər sanksiyalar tətbiq edilərsə və söyləndiyi kimi sərt xarakter daşıyarsa, bir çox ölkələrdə bunun müəyyən təsirləri ola bilər:

“Lakin düşünürəm ki, Azərbaycan Rusiya ilə müəyyən ticarət əlaqələri qursa da, bu, Bakının ümumi ticarət dövriyyəsində yüksək paya malik deyil. Digər tərəfdən, nəzərə almaq lazımdır ki, sanksiyalar əsasən strateji məhsullara yönəlir və Azərbaycan-Rusiya ticarətində bu kateqoriyaya aid malların həcmi o qədər də böyük deyil. Bu baxımdan, sanksiyaların Azərbaycana ciddi təsir göstərəcəyini düşünmürəm”.

Fidan Hacızadə
Sfera.az

Trampın sərt ritorikası Azərbayacana da işləyəcək? - RƏY