ABŞ Prezidenti Donald Tramp iyulun 14-də Rusiya ilə bağlı ciddi bəyanatla çıxış edəcək. Amerika lideri qarşıdakı bəyanatın məzmunu ilə bağlı hər hansı təfərrüat açıqlamayıb.

Tramp yekun bəyanatında nə deyə bilər? O, Rusiyaya qarşı daha sərt ritorika sərgiləyə bilərmi?

Mövcud suallarla bağlı Sfera.az-a açıqlama verən politoloq Oqtay Qasımov Donald Trampın səsləndirəcəyi bəyanatlar və Rusiyaya ünvanlayacağı mesajlarla bağlı bildirib ki, o, hakimiyyətə gəldikdən sonra təxminən yarım il ərzində Rusiyaya müəyyən jestlər etdi, Moskva ilə dialoqa cəhd göstərdi və Ukraynadakı müharibəni dayandırmağa çalışdı:

“Lakin əvvəlcədən də bəlli idi ki, Vladimir Putin ABŞ-nin bu mövqeyindən istifadə etməyə, prosesi uzatmağa və öz maraqları naminə müxtəlif addımlar atmağa çalışacaq. Aprelin sonlarından etibarən isə Donald Trampın Rusiyaya münasibətində müəyyən dəyişikliklər hiss olunmağa başladı. Son telefon danışığından sonra Tramp, Putinlə təmasların çox səmərəli olmadığını, bununla bağlı təəssüf hissi keçirdiyini və məyus olduğunu açıqladı. Eyni zamanda, belə bir siqnal verildi ki, bundan sonra Vaşinqtonun Moskva ilə münasibətlərində müəyyən dönüş nöqtəsi baş verə bilər”.

Politoloq dünən Donald Trampın Ukraynaya dəstək verdiyinə dair bəyanatında artıq bu dəyişikliklərin ilkin əlamətlərini ortaya qoyduğunu deyib.

O qeyd edib ki, Tramp prezident kimi ilk dəfə Ukraynaya hərbi yardım qərarı qəbul etdi:

“İndiyə qədər göstərilən yardımlar əsasən Bayden administrasiyasının qərarları əsasında həyata keçirilirdi. İndi isə təxminən 3 milyard dollarlıq hava hücumundan müdafiə sistemlərinin verilməsi məsələsi həllini tapdı. Bu proses Trampın dediyi kimi həyata keçiriləcək. ABŞ silahları NATO-ya satacaq, NATO isə həmin texnikanı Ukraynaya ötürəcək. Yəni dolayısı yolla ABŞ, Ukraynanın hərbi güclənməsini davam etdirəcək”.

O.Qasımov Donald Tramp Rusiya tərəfinə konkret mesaj göndərəcəyindən və açıq şəkildə bəyanətindən bəhs edərək vurğulayıb ki, Ukraynada atəşkəsin əldə olunması zəruridir:

“Əks halda, ABŞ daha sərt və radikal addımlar ata bilər. Yəni Ukraynaya daha genişmiqyaslı dəstəyin göstərilməsi artıq ciddi müzakirə predmetinə çevrilə bilər.
Digər tərəfdən nəzərə alsaq ki, ABŞ Senatında 83 senator Rusiyaya qarşı növbəti, daha sərt sanksiyaların tətbiqi ilə bağlı qanun layihəsini dəstəkləyir və bu layihənin təşəbbüskarları dünən Romada Volodimir Zelenski ilə görüşüblər, görünən odur ki, Vladimir Putinin siyasəti ABŞ-ı Ukraynanı daha çox dəstəkləməyə vadar edir. Böyük ehtimalla, Donald Trampın növbəti açıqlamalarında da bu məqamların əks olunacağı gözlənilir”.

Fidan Hacızadə
Sfera.az

Tramp 14 iyulda Rusiya-Ukrayna müharibəsini bitirəcək? - AÇIQLAMA