Əliyev və Paşinyan görüşəcək - Sülh imzalanır?

Azərbaycan Respublikası ilə Ermənistan Respublikası arasında davam edən sülh prosesi çərçivəsində iyulun 10-da Birləşmiş Ərəb Əmirliklərinin Əbu-Dabi şəhərində Azərbaycan Prezidenti İlham Əliyevlə Ermənistanın Baş naziri Nikol Paşinyan arasında ikitərəfli görüş keçiriləcək.

Maraqlıdır, görüşdə sülh sazişi ilə bağlı ciddi irəliləmə qeydə alına bilərmi?

Mövzu ilə bağlı Sfera.az- açıqlama verən siyasi şərhçi Aqşin Kərimov bildirib ki, Azərbaycan və Ermənistan liderləri arasında fərqli platformada görüşlərin keçirilməsi eksklüziv razılaşmalar imkanlarını artırır. 

Onun sözlərinə görə, Azərbaycan Prezidenti İlham Əliyevlə Ermənistanın Baş naziri Nikol Paşinyanın sülh gündəmi üzrə intensiv müzakirələri və bundan irəli gələn razılıqların icrası regional təhlükəsizlik və sülh üçün böyük addımların qət olunduğunu deməyə əsas verir. 

Siyasi şərhçi qeyd edib ki, bunlara baxmayaraq, hələ də Azərbaycanın irəli sürdüyü bəzi tələblər Ermənistan tərəfindən yerinə yetirilməyib:

“Bir neçə məsələ hələ də həll olunmamış qalır. Bunlar Zəngəzur dəhlizinin açılması, sərhədlərin delimitasiya və demarkasiyası, Qərbi azərbaycanlıların qayıdış məsələsi və Ermənistan konstitusiyasının dəyişdirilməsi ilə əlaqədar məsələləri əhatə edir. Görünən odur ki, Paşinyan bu tələbləri yerinə yetirmək üçün səylərini intensivləşdirib və Əbu-Dabi görüşündə nəticələr barədə İlham Əliyevə hesabat verəcək”. 

A.Kərimov qeyd edib ki, indi üçün birbaşa  sülh müqaviləsindən danışmaq bir qədər  tezdir:

“Lakin Azərbaycan-Ermənistan sülh gündəliyindəki məsələlərin kənar müdaxilələr olmadan geniş bir spektrdə inkişaf etməsi yaxşı haldır. Bu səbəbdən Əbu-Dabi görüşü xüsusi əhəmiyyət kəsb edir. Görüşün başqa bir ölkədə keçirilməsinə baxmayaraq, bu, ikitərəfli  nizamlanma mexanizmlərinin formalaşmasına və Bakının şərtləri altında təşkil olunan danışıqların daha da irəliləməsinə şərait yaradacaq platformadır. Bununla belə, birbaşa sülh müqaviləsindən danışmaq üçün hələ tezdir, lakin sülh müqaviləsi üçün lazım olan diplomatik-siyasi addımlar atılır. Bunların müəyyən nəticələrini də görməkdəyik. Bu, kifayət qədər proqressiv və regional inkişafa təkan verən addımlardır”. 

Siyasi şərhçinin fikrincə, Ermənistan bu trayektoriyada qalsa, Azərbaycan və Türkiyənin strateji müttəfiqliyinin çətiri altında öz təhlükəsizliyini qoruyacaq və regional əməkdaşlıqda iqtisadi açılımı üçün zəmanətlər qazanacaq. 

Firuzə Əliyeva
Sfera.az