İsrail ABŞ-İran təmaslarına necə reaksiya verəcək? - AÇIQLAMA
Ağ Evin mətbuat katibi Karolayn Livitt brifinq zamanı bildirib ki, ABŞ Tehranla diplomatik əlaqələri davam etdirir və Ağ Ev rəsmi Tehranın nüvə proqramı ilə bağlı yeni razılaşmaya ümid edir.
“Sazişlə bağlı iranlılarla birbaşa və dolayı əlaqə saxlanılır”,- Livitt vurğulayıb.
ABŞ-nin İranla nüvə proqramı ilə bağlı təmaslarını davam etdirməsi İsrailin təhlükəsizlik narahatlıqlarına necə təsir göstərə bilər?
Sfera.az-a açıqlama verən politoloq Züriyə Qarayeva ABŞ-nin İranla nüvə proqramı üzrə təmaslarının İsraildə ciddi narahatlığa səbəb olduğunu deyib.
Onun sözlərinə görə, Təl-Əviv uzun illərdir İranın nüvə fəaliyyətlərini milli təhlükəsizliyinə birbaşa təhdid kimi qiymətləndirir:
“Vaşinqtonun Tehranla diplomatik kanalları açıq saxlamağa çalışması və mümkün razılaşma üçün zəmin yaratması isə İsrailin strateji baxışları ilə ziddiyyət təşkil edir. İsrail hesab edir ki, İranla əldə ediləcək istənilən razılaşma Tehran rejiminin nüvə ambisiyalarını tamamilə dayandırmaq əvəzinə, onları legitimləşdirə və İrana vaxt qazandıra bilər”.
Politoloq İsrailin əsas narahatlıqlarından biri kimi ABŞ-lə İran arasında imzalanacaq istənilən sazişin uranın zənginləşdirilməsi səviyyəsini texniki baxımdan məhdudlaşdıra biləcəyini, lakin İranın bölgədəki raket proqramının, HƏMAS və Hizbullah kimi qruplara dəstəyi və regional təsir imkanları ilə bağlı heç bir təminat verməyəcəyini qeyd edib.
O bildirib ki, bu, İsrailin təhlükəsizlik mühitində qeyri-müəyyənliyi artırır və Təl-Əvivi daha sərt cavab tədbirləri görməyə sövq edə bilər:
“Eyni zamanda, ABŞ-İran təmaslarının fəallaşması İsraildə Amerikanın “İranı güzəştlərlə cilovlama” siyasətinə olan etimadı azaldır. Baş nazir Netanyahunun rəhbərlik etdiyi sağçı koalisiya açıq şəkildə bəyan edir ki, İranla diplomatik yollarla aparılan proseslər nəticə verməyəcək və ölkənin təhlükəsizliyini yalnız hərbi tədbirlərlə təmin etmək mümkündür”.
Z.Qarayeva bu yanaşmanın İsrailin gələcəkdə İranın nüvə obyektlərinə qarşı preventiv zərbələr endirmək ehtimalını da gücləndirdiyini vurğulayıb:
“Beləliklə, ABŞ-nin İranla razılığa yönəlmiş təmasları İsrailin təhlükəsizlik strategiyasını zəiflədən, onu daha sərt və radikal addımlar atmağa sövq edən mühüm amil kimi çıxış edir. Bu proses həm regional sabitliyə, həm də ABŞ-İsrail münasibətlərinə təsirsiz ötüşməyə bilər”.
Fidan Hacızadə
Sfera.az
