MİQ-də qiymətləndirmə bu meyarlarla aparılır
“Müəllimlərin İşə Qəbulu (MİQ) üzrə imtahanda namizədlər fənn, pedaqogika və fənnin tədrisi metodikası üzrə suallar əsasında qiymətləndirilirlər”.
Sfera.az xəbər verir ki, bunu bu gün 161 nömrəli məktəbdə müəllimlərin işə qəbulu (MİQ) imtahanı ilə bağlı açıqlamasında Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu sosial şəbəkələrdə metodika üzrə sualların çətin olduğu barədə səslənən fikirlərə əsasən bildirilib.
O bildirib ki, metodikaya dair tətbiqi sualların cavablandırılması yalnız nəzəri metodiki bilikləri deyil, həm də pedaqoji təcrübəni tələb edir.
Onun sözlərinə görə, situasiyanı aydın dərk edən və pedaqoji duyumu güclü olan namizədlər belə sualları cavablandırmaqda çətinlik çəkmirlər.
“Unutmayaq ki, müəllimlərin dərin metodiki bilikləri və tətbiq bacarıqları şagirdlərin nəticələrində də özünü göstərir”, – deyə o vurğulayıb.
Direktor müavini müəllimlərə və namizədlərə çağırış edərək metodiki biliklərin həm nəzəri, həm də praktiki tərəflərinə daha çox diqqət ayrılmasının vacibliyini qeyd edib. Onun sözlərinə görə, bu istiqamətdə bilik və bacarıqların artırılması həm müəllimlərin peşəkarlığını yüksəldəcək, həm də təlim prosesini şagirdlər üçün daha maraqlı və səmərəli edəcəkdir.
Fidan Hacızadə
Sfera.az
