Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Meksikaya işgüzar səfəri zamanı “Mundo Internacional” jurnalına verdiyi müsahibədə deyib ki, Azərbaycan ilə Ermənistan arasında münasibətlərin normallaşdırılması üçün saziş layihəsinin mətni üzrə müzakirələr tamamlanıb.

E.Əmirbəyov Ermənistanla sülh prosesi barədə danışıb, 30 illik münaqişədən sonra Cənubi Qafqaz regionunda dayanıqlı və dönməz sülhün əldə olunması üçün tarixi bir fürsətin yarandığını qeyd edib. Eyni zamanda, sazişin imzalanmasına mane olan amillərdən söz açıb. Bunlar arasında Ermənistan konstitusiyasında Azərbaycana qarşı ərazi iddialarının mövcudluğu kimi sülh sazişinin məzmunu və ruhuna zidd olan məqamların, habelə Minsk Qrupu kimi öz əhəmiyyətini itirmiş təsisatların ləğv edilməsi zərurətinin olduğu vurğulanıb.

Maraqlıdır, sülh müqaviləsinin imzalanmasına nə qədər yaxınlaşmışıq?

Mövzu ilə bağlı Sfera.az-a açıqlama verən siyasi şərhçi Kənan Novruzov bildirib ki, Prezidentin köməkçisinin səsləndirdiyi fikirlərdə diqqət çəkən bir neçə məqam var. Onun dediklərindən belə məlum olur ki, müzakirələr müsbət dinamika ilə davam edir. Əslində, Ermənistan tərəfindən verilən mesajlar da bunu göstərir.

K.Novruzov qeyd edib ki, E.Əmirbəyovun Azərbaycanla Ermənistan arasında münasibətlərin normallaşdırılması üçün saziş layihəsinin mətni üzrə müzakirələrin tamamlanmasına dair səsləndirdiyi fikirlər belə düşünməyə əsas verir ki, artıq tərəflər arasında ciddi konsensus əldə olunmaqdadır:

“Görünür, rəsmi İrəvan reallıqları anlayır və qəbul edir. Buna baxmayaraq, hələ həllini gözləyən məsələlər var. Onlar əsasən rəsmi Bakının haqlı tələbləri ilə bağlıdır. E.Əmirbəyov müsahibəsində həmin şərtləri növbəti dəfə diqqətə çatdırıb: Ermənistan konstitusiyasının dəyişilməsi və Minsk Qrupunun ləğvi.

Hər iki şərt məntiqlidir. Birincisi, nəzərə almaq lazımdır ki, Ermənistan konstitusiyasında Azərbaycana qarşı ərazi iddiaları var. Belə olan halda Azərbaycanın sülh sazişinə getməsi doğru olmaz. Çünki Ermənistanın növbəti hakimiyyəti gələcəkdə konstitusiyaya istinad edərək yenidən ərazi iddiası edə bilər. Rəsmi Bakı bunu istəmir. Konstitusiya dəyişikliyi sülhün davamlılığını təmin edəcək”.

Mütəxəssisin fikrincə, Minsk Qrupunun əsas missiyası Ermənistanla Azərbaycan arasındakı konflikti həll etmək idi, lakin bunu bacarmadı:

“Otuz il ərzində “sinifdə qaldı”. Azərbaycan öz işini özü gördü. Belə olan halda artıq Minsk Qrupuna ehtiyac yoxdur. Hətta sülh müzakirələrinin davam etdiyi bir vaxtda və gələcəkdə sülh sazişi izlanandan sonrakı dövrdə bu qurumun mövcudluğu təhlükə yarada bilər. Həmsədrlər “oyuna daxil olaraq” “suları bulandırmağa” çalışa bilərlər. Buna şans yaradılmamalıdır”.

Siyasi şərhçi vurğulayıb ki, bu gün sülh Azərbaycandan daha çox Ermənistana lazımdır:

“Çünki Azərbaycan ərazi bütövlüyünü təmin edib, regionun və dünyanın əsas oyunçularından birinə çevrilib. Ermənistan isə müstəqil xarici siyasət kursuna malik deyil. Qərblə Rusiya arasında siyasi poliqon olan Ermənistanın gələcəkdə hərbi poliqona çevrilməsi də istisna deyil. Belə olan halda Azərbaycan və Türkiyə ilə münasibətlərin normallaşdırılması Ermənistan üçün yeni təhlükəsizlik çətiri ola bilər.

Rəsmi İrəvan bunu nəzərə almalı və konstruktiv mövqe ortaya qoymalıdır. Əks halda sonra gec ola bilər…”

Firuzə Əliyeva
Sfera.az

Prezidentin nümayəndəsi açıqlama verdi : Ermənistanla sülh imzalanır?