Azərbaycanda dövlət idarəçiliyində uzun illərdir təcrübə və peşəkarlığı ilə tanınan şəxslər bu gün də müxtəlif yüksək vəzifələrdə fəaliyyətlərini davam etdirirlər. Bəzi hallarda pensiya yaşını keçmiş bu şəxslər dövlətin müxtəlif sahələrində – parlamentdən elmə, universitetlərdən icra hakimiyyətlərinə qədər önəmli mövqeləri qoruyurlar.

Sfera.az 1 iyul 2025-ci il tarixinə olan məlumatlara əsasən, Azərbaycanda vəzifədə olan və yaşı 70-i keçən şəxslərlə bağlı geniş araşdırma aparıb. Siyahı həm yaş, həm vəzifə, həm də onların keçdiyi dövlət yolu baxımından təqdim olunur.

Prezident Administrasiyası və Nazirlər Kabinetində yaşlı liderlər:

Yaqub Eyyubov (80 yaş) – Baş nazirin birinci müavini. 2003-cü ildən bu vəzifədə çalışır. İqtisadi sahədə ixtisaslaşıb.

Əhməd Əhmədzadə (80 yaş) - Azərbaycan Respublikasının Baş nazirinin köməkçisi 4 oktyabr 2024-cü il tarixindən bu vəzifədədir. Qeyd edək ki, o bundan əvvəl baş nazirin müşaviri, ondan öncə isə Meliorasiya və Su Təsərrüfatı Açıq Səhmdar Cəmiyyətinin sədri olub.

Tələt Məcidov (80 yaş) – 2017-ci ildən Azərbaycan Respublikası Prezidentinin Administrasiyasının Dövlət qulluğu və kadr məsələləri şöbəsinin müdiridir.

Ramil Usubov (77 yaş) – sabiq daxili işlər naziri, 2019-cu ildən Prezident yanında Təhlükəsizlik Şurasının katibidir.

Bəylər Eyyubov (74 yaş) – Bu ildən Azərbaycan Respublikası Prezidentinin Katibliyinin rəisi, əvvəllər Azərbaycan Respublikası Prezidentinin Təhlükəsizlik Xidmətinin rəisi vəzifəsində çalışıb.

Əsgər Rəsulov (71 yaş) - 2018-ci ildən Azərbaycan Respublikası Milli Arxiv İdarəsinin rəisidir.

Azərbaycan parlamentində yaşlı nəslin təmsilçiləri fəallıqlarını davam etdirirlər. 2025-ci il üçün Milli Məclisdə 70 yaşını keçmiş 19-a yaxın deputat yer alır:

Ziyad Səmədzadə (84 yaş) – iqtisadiyyat elmləri doktoru, uzun illərdir Milli Məclisin deputatıdır.

Eldar İbrahimov (79 yaş) – parlamentin təcrübəli üzvü, bir neçə çağırış deputat seçilib.

Polad Bülbüloğlu (79 yaş) – tanınmış sənətkar, hazırda Azərbaycanın Rusiya səfiri olsa da, deputat statusunu daşıyır.

Əhliman Əmiraslanov (təqribən 77 yaş) – onkoloq, akademik, elm və səhiyyə sahəsinin tanınmış siması.

Əli Əhmədov (72) - Azərbaycan Respublikası Milli Məclisinin Sədrinin 1-ci müavini, fəlsəfə elmlər namizədi, dosent.

Digər 70+ yaşlı deputatlar: Tahir Rzayev (75), Elman Məmmədov (75), Rasim Musabəyov (74), Cavanşir Paşazadə (72), Eldar Quliyev (74), Fəzail İbrahimli (74), Səyyad Salahlı (73), Asim Mollazadə (72), Aqil Abbas (72), Mübariz Qurbanlı (71), Sabir Hacıyev (71) və Rafael Hüseynov (71).

Elmi və akademik dairələr:

İsa Həbibbəyli (76 yaş) – 2022-ci ildən Azərbaycan Milli Elmlər Akademiyasının prezidenti. Azərbaycan Respublikasının Milli Məclisinin III, IV, V və VI çağırışlarının deputatı.

Gülçöhrə Məmmədova (72 yaş) – 2000-ci ildən Azərbaycan Memarlıq və İnşaat Universitetinin rektorudur. Memarlıq sahəsində ilk qadın akademiklərdəndir. İkinci çağırış Azərbaycan Respublikası Milli Məclisinin deputatı olub.

Məleykə Abbaszadə (72 yaş) – Dövlət İmtahan Mərkəzinin Direktorlar Şurasının sədri.

Bəzi rayonların icra başçıları da yaş həddi baxımından siyahıya daxildir:

Mübariz Əhmədzadə (78 yaş) – 2009-cu ildən Zaqatala Rayon İcra Hakimiyyətinin başçısıdır.

Bayram Səfərov (74 yaş) - 2009-cu ildən Şuşa Rayon İcra Hakimiyyətinin başçısıdır.

Rafil Hüseynov (72 yaş) - 2019-cu ildən Ağcabədi Rayon İcra Hakimiyyətinin başçısıdır.

Şahmar Usubov (72 yaş) – 2000-ci ildən Xocalı Rayonu İcra Hakimiyyətinin başçısıdır.

Novruz Novruzov (71 yaş) – 2019-cu ildən Siyəzən Rayon İcra Hakimiyyətinin başçısıdır.

Zakir Fərəcov (71 yaş) - Sumqayıt şəhər İcra Hakimiyyətinin başçısı 1 sentyabr 2015-ci il tarixindən bu vəzifədədir.

Azərbaycanda yaşlı dövlət məmurlarının dövlət idarəçiliyindəki iştirakı həm müsbət, həm də bəzən ictimai debatlara səbəb olan bir haldır. Təcrübəli kadrlar uzunmüddətli idarəetmə təcrübəsi və sabitlik gətirsə də, yeni nəslin önə çıxması çağırışları da gündəmdə qalır.

Statistikaya əsasən, ən çox 70 yaşdan yuxarı şəxslər parlament və elmi dairələrdə təmsil olunur. Bu, həm təcrübə kapitalının qorunması, həm də dövlət sistemində peşəkarların yerinin hələ də önəmli olmasının göstəricisidir.

Firuzə Əliyeva
Sfera.az

Azərbaycanda yaşı 70-i keçən vəzifəlilər - SİYAHI