Bir müddət bundan əvvəl Amerika Birləşmiş Ştatlarının Prezidenti Donald Tramp İranda rejim dəyişdiyini istəmədikləri barədə bəyanat vermişdi, amma son bəyanatlar isə Trampın da bu istiqamətdə meyl etdiyini göstərir. Trampın son 15 gün ərzində verdiyi bəyanatların hamısı bir birinə ziddiyyət təşkil edir. Məsələn, Tramp İrana iki həftə vaxt verdiyi haqqında bəyanatlar səsləndirdi, lakin iki gün keçməmiş artıq İrana hücum təşkil olundu.

Trampın bu qədər sürətli fikir dəyişməsinin səbəbi nədir, bu nəyə hesablanır?

Mövzu ilə bağlı Sfera.az-a açıqlama verən politoloq Əlimusa İbrahimov bildirib ki, ya Tramp özü tez-tez fikrini dəyişir, ya da ki, ictimai rəyi, o cümlədən İranın sayıqlığını azaltmaq məqsədilə atılan addımlardır.

Onun fikrincə, Amerika Birləşmiş Ştatları İranda rejim dəyişikliyinin əleyhinə deyil:

“Əgər İsrail bunu istəyirsə, İranda rejim dəyişikliyi baş verəcək və heç şübhəsiz o, Trampı da bu rejim dəyişikliyinə razı sala biləcək. Bu məsələ əsas İsrail-İran arasında gedən müharibədə hansı səviyyədə uğur qazanılacağından asılı olacaq. Gördüyümüz kimi, İsrailin uğur qazanmaması və İranın nüvə obyektlərini sıradan çıxara bilməməsi ABŞ-nin B-2 bombardman təyyarələrindən istifadə edərək o obyektlərə zərbələr endirməsinə səbəb oldu. Əgər İsrail İranın raketləri qarşısında davam gətirə bilməyəcəksə, heç şübhəsiz, ABŞ birbaşa hücumdan başqa digər variantlara əl atacaq. Bu variant da İranda rejim dəyişimidir”.

Politoloq qeyd edib ki, ABŞ, o cümlədən İsrail, strategiyaları 100 ölçüb bir biçəcəklər və əgər İranda rejim dəyişi üçün dəyişikliyi üçün uyğun variant olacaqsa, bu istiqamətdə addım atacaqlar:

“Rejim dəyişikliyinə cəhdin bir fayda verməyəcəyini qabaqcadan bilsələr, buna cəhd etməyəcəklər. Ona görə ki, təbii ki, İranda rejim dəyişikliyi əvəzinə rejimin daha da möhkəmləndirilməsi baş verə bilər. Hər an ABŞ bu istiqamətdə düyməyə basa bilər”.

Firuzə Əliyeva
Sfera.az

"İsrail Trampı razı sala bilər ki, İranda..." - AÇIQLAMA