İrandan gələn xarici vətəndaşlar Azərbaycanda qalır? - XİN-dən CAVAB

Son günlərdə İranla İsrail arasında yaşanan gərginlik bölgədə ciddi narahatlıqlar yaradıb. Regionda müharibə ehtimalı gücləndikcə, əhalinin bir hissəsi təhlükəsizlik məqsədilə ölkədən çıxmağa çalışır.

Həm İran vətəndaşları, həm də İranda yaşayan əcnəbilər qonşu ölkələrə, o cümlədən Azərbaycana doğru hərəkətə keçiblər.

Məsələ ilə bağlı Azərbaycan Xarici İşlər Nazirliyi vəziyyətə aydınlıq gətirib. Nazirliyin mətbuat katibi Ayxan Hacızadə bildirib ki, yalnız dünənə olan məlumata əsasən, 600 nəfərdən çox Azərbaycan vətəndaşı sərhəddən keçid üçün müraciət edib və onlardan 180 nəfər artıq Azərbaycan ərazisinə daxil olub. İndiyə qədər 77 ölkədən daxil olan müraciətlər müvafiq qaydada nəzərdən keçirilir və həmin ölkələrin vətəndaşlarının keçidinə şərait yaradılır.

Sfera.az yaranmış vəziyyətlə bağlı Azərbaycan Xarici İşlər Nazirliyinə sorğu ünvanlayıb. 

Nazirliyin mətbuat katibi Ayxan Hacızadə bildirib ki, İrandan gələn xarici ölkə vətəndaşları Azərbaycanı yalnız tranzit məqsədilə istifadə edirlər.

Belə ki, hazırda xarici vətəndaşlar ölkəmizdən miqrasiya və ya sığınacaq məqsədilə istifadə etmirlər. Sadəcə olaraq, Azərbaycan ərazisindən keçid üçün istifadə edirlər sonra digər ölkələrə yola düşürlər.

Məlumata görə, hazırda rəsmi qurumlar prosesləri nəzarətdə saxlayır və regiondakı geosiyasi gərginliyə uyğun olaraq təxliyə və humanitar məsələlərlə bağlı koordinasiyalı işlər görülür.

Firuzə Əliyeva
Sfera.az